TÜRKSOY
6 қараша 20262 мин оқу

Стамбұлда Абдолла Қарсақбаевтың 100 жылдық мерейтойы қарсаңында «Менің атым Қожа» фильмі көрермен назарына ұсынылды

PHOTO-2026-11-06-23-12-59

Қазақ кино өнерінің классигі, көрнекті кинорежиссер және Қазақ КСР-інің Еңбек сіңірген өнер қайраткері Абдолла Қарсақбаевтың туғанына 100 жыл толуына орай Стамбұлда арнайы еске алу іс-шарасы өтті. «VI Қорқыт Ата түркі әлемі кинофестивалі» аясында ұйымдастырылған жиында режиссердің шығармашылық мұрасы талқыланып, әйгілі «Менің атым Қожа» фильмі көрермен назарына ұсынылды.

Стамбұлда өткен «I Халықаралық Қорқыт Ата түркі әлемі кино симпозиумы» аясында қазақ киносының көрнекті режиссері Абдолла Қарсақбаевтың 100 жылдық мерейтойына арналған еске алу кеші ұйымдастырылды.

ТҮРКСОЙ халықаралық ұйымы да серіктес ретінде атсалысқан симпозиумда ТҮРКСОЙ Бас хатшысы Сұлтан Раевпен қатар, ҚР Мәдениет және ақпарат министрлігіне қарасты «Ұлттық киноны қолдау мемлекеттік орталығы» КЕАҚ Басқарма төрағасының орынбасары Әділет Омаров және Шәкен Айманов атындағы «Қазақфильм» ұлттық киностудиясының баспасөз хатшысы Надира Садуова сөз сөйлеп, Қарсақбаевтың қазақ киноөнеріндегі орны мен шығармашылық мұрасы жайында баяндама жасады.

Сұлтан Раев: «Өз мәдениетінен нәр алған өнер ғана күллі адамзатқа үн қата алады»

Іс-шарада сөз сөйлеген ТҮРКСОЙ Бас хатшысы Сұлтан Раев Қарсақбаевтың қазақ халқының тұрмыс-тіршілігін, мәдениеті мен құндылықтарын көгілдір экранға шығару арқылы кино тарихында өшпес із қалдырғанын атап өтті.

Режиссер туындыларының Қазақстан шекарасынан асып, өзге елдердің көрермендерінің де ыстық ықыласына бөленгенін айтқан Раев: «Өз мәдениетінен нәр алған өнер ғана күллі адамзатқа үн қата алады», – деді.

Киноның мәдени түсінікті сақтайтын, халықтарды бір-біріне жақындатып, ортақ болашақты қалыптастыратын қуатты мәдени көпір екенін баса айтқан Бас хатшы, Қарсақбаевтың өз ұлтының болмысын бейнелеу арқылы осындай алтын көпір орната білген ұлы суреткерлердің бірі екенін жеткізді.

Сондай-ақ ол Абдолла Қарсақбаевтың 100 жылдық мерейтойының ЮНЕСКО-ның атаулы күндер күнтізбесіне енгізілуінің маңыздылығына тоқталып, ТҮРКСОЙ ұйымының да осы айтулы мерейтойды түркі әлемі көлемінде атап өту туралы шешім қабылдағанын айтты. Раев бұл бастама ұлы режиссердің туындыларын жас ұрпақпен қайта қауыштыруға және қазақ киносының бай мұрасын кеңінен насихаттауға бағытталғанын жеткізді.

Қарсақбаевтың қазақ киносына қосқан үлесі талқыланды

Еске алу бағдарламасында сөз алған «Ұлттық киноны қолдау мемлекеттік орталығы» Басқарма төрағасының орынбасары Әділет Омаров пен Шәкен Айманов атындағы «Қазақфильм» ұлттық киностудиясының баспасөз хатшысы Надира Садуова да Абдолла Қарсақбаевтың өмір жолы мен ұлттық кинематографияға қалдырған мұрасы жайлы сөз қозғады.

«Менің атым Қожа» фильмі көрерменмен қайта қауышты

Іс-шара аясында Абдолла Қарсақбаевтың қазақ киносының алтын қорына енген әйгілі «Менің атым Қожа» фильмі көрсетілді.

Балалық шақ әлемін, достықты, адалдық пен адами қарым-қатынастарды арқау еткен бұл туынды – Қазақстаннан тыс жерлерде де түрлі буын көрермендерінің есінде қалған бірегей фильмдердің бірі.

Фильм көрсетілімі алдында Надира Садуованың қатысуымен өткен кездесуде картинаның түсірілу барысы мен Қарсақбаевтың кино саласындағы еңбектері кеңінен сөз болды.

Режиссердің 100 жылдығына орай ұйымдастырылған бұл бағдарлама қазақ киносының жауһарларын көрерменмен қайта қауыштыруға және түркі әлемінің ортақ кино мұрасын дәріптеуге зор үлес қосты.

Медиа галереясы

(4)

Бізге жазылыңыз

Twitter / XYouTubeFacebookLinkedInInstagram
Бізбен байланыс

Мекен-жайымыз:
Ферит Реджаи Ертұғрыл көшесі 8
Oр-Ан AНКАРA/TҮРКИЯ

Байланыс нөмірі және факс мекен-жайы
T: +90 (312) 491 01 00 (pbx)
F: +90 (312) 491 01 11

Электронды мекен-жайымыз:
turksoy@turksoy.org

© 2026 TÜRKSOY — Барлық құқық сақталған