Әндіжанда V түркі әлемі музейлерінің кездесуі өтті
Өзбекстанның Әндіжан қаласында «Түркі әлеміндегі ұлттық киімдер» тақырыбында «V түркі әлемі музейлерінің кездесуі» өтті.
Халықаралық ТҮРКСОЙ түркі мәдениеті ұйымының бастамасымен 2026 жылғы түркі әлемінің мәдени астанасы Әндіжанда ұйымдастырылған бағдарламаға Әзербайжан, Қазақстан, Қырғызстан, Түркия, Түрікменстан, Молдоваға қарасты Гагауз Автономия облысы мен Өзбекстанның түрлі аймақтарынан 50-ге жуық музей маманы қатысты.
Кездесуде түркі халықтарының дәстүрлі киім мәдениеті, ұлттық киімдері және мәдени мұраны сақтаудағы музейлердің рөлі талқыланып, бес отырыста 20 академиялық баяндама жасалды.
«Түркі әлеміндегі бас киімдер» көрмесі ашылды
Симпозиум алдында қатысушылар назарына ұсынылған «Түркі әлеміндегі бас киімдер» тақырыбындағы «II түркі әлемі бірлескен көрмесі» халықтардың дәстүрлі бас киімдері мен мәдени байлығын бейнелеп, шараның негізгі тақырыбымен үндестік тапты.
ТҮРКСОЙ Бас хатшысы Сұлтан Раев, Әндіжан әкімдігінің өкілі Элиор Холмирзаев, Өзбекстан мәдени мұра агенттігінің өкілі Дилобар Мирхусанова және ТҮРКСОЙ Музейлер одағының 2026 жылғы төрайымы Жаннат Исмаилованың қатысуымен өткен салтанатты ашылуда ортақ мәдени мұраны сақтау және оны болашақ ұрпаққа жеткізудегі музейлердің стратегиялық рөлі баса айтылды.
Музей мамандарына ТҮРКСОЙ ордені табысталды
Салтанатты шарада ТҮРКСОЙ Бас хатшысы Сұлтан Раев түркі әлемінің музей ісіне қосқан үлесі үшін Өзбекстан Мемлекеттік тарих музейінің директоры Жаннат Исмаилова мен Дмитрий Карачобан атындағы Гагауз тарих және этнография музейінің директоры Людмила Маринге «ТҮРКСОЙ» орденін табыстады.
Сонымен қатар, шара аясында түркі әлеміндегі музейлер арасындағы институционалдық ынтымақтастықты нығайту мақсатында Өзбекстанның түрлі аймақтарындағы 10 музейге ТҮРКСОЙ Музейлер одағының ресми мүше болғаны жөніндегі арнайы сертификаттары берілді.
Медиа галереясы
(36)
