Әндіжанда Әзербайжан Мемлекеттік пантомима театры «Ібіліс» қойылымын сахналанды
Өзбекстанның Әндіжан қаласында өтіп жатқан IV ТҮРКСОЙ Халықаралық театр фестивалі аясында Әзербайжан Мемлекеттік пантомима театры көрермен назарына «Ібіліс» атты спектакльді ұсынды.
Әзербайжан әдебиетінің көрнекті өкілі Гусейн Джавидтің шығармашылық мотивтері негізінде сахналанған қойылымның режиссері — Әзербайжан Республикасының Еңбек сіңірген артисі Бәхруз Вагифоглу. Спектакльдің қимыл-қозғалысын Еңбек сіңірген артист құрметті атағының иегері Сабина Гаджиева ұйымдастырған.
Тұсаукесері 2023 жылдың 11 наурызында өткен, ұзақтығы 60 минуттық бұл туындының декорациясы мен костюм суретшісі — Хайям Самедов. Басты рөлдерді Сабина Гаджиева (Ібіліс) мен Нұрлан Рүстемов (Таңдаулы) сомдаған.
Соғыс, зорлық-зомбылық пен ашаршылық жайлаған әлемді арқау еткен бұл туынды адамдардың өздері жасаған қараңғылық пен қателіктері үшін бір көшбасшы сайлап алып, бүкіл жауапкершілікті соған арта салатын әдетін суреттейді. Адамзат пен Ібіліс арасындағы мәңгілік тартыс баяндалатын қойылымда оқиғаларды жанды әрі визуалды тұрғыдан әсерлі жеткізу үшін Франсиско Гойя, Микеланджело және Огюст Роден сияқты әлемге танымал суретшілер мен мүсіншілердің туындыларынан шабыт алған пластикалық формалар қолданылған. Қозғалыс пен визуалды композицияға негізделген бұл туынды адам табиғаты, ізгілік пен зұлымдық арасындағы күреске қатысты бітпейтін сұрақтарды сахна төрінен тағы бір мәрте таразылайды.
ТҮРКСОЙ, Өзбекстан Республикасы Мәдениет министрлігі және Әндіжан әкімдігінің ұйымдастыруымен 18-23 қазан аралығында ұйымдастырылған фестивальде сахналанған бұл қойылым өнерсүйер қауым мен фестиваль қонақтарының ыстық ықыласына бөленді.
Медиа галереясы
(9)
