Qırğız Çadırı Macarıstanda ziyarətə açılıb
TÜRKSOY-un Baş katibi Sultan Raevin təşəbbüsü ilə Qırğızıstan Milli Manas Teatrı tərəfindən Lakitelek Fonduna hədiyyə edilən ənənəvi qırğız çadırı 24 oktyabr 2026-cı il tarixində Macarıstanın Lakitelek şəhərindəki Hungarikum Ligetdə keçirilən mərasimlə açılıb.
Qırğız Mədəniyyəti Günü çərçivəsində təşkil olunan mərasimdə TÜRKSOY-un Baş katibi Sultan Raev, Lakitelek Fondunun Himayəçilər Şurasının sədri Sándor Lezsák, Türk dövlətlərinin Macarıstandakı səfirliklərinin nümayəndələri və çoxsaylı dəvətlilər iştirak ediblər.
Mərasimdə çıxış edən Sándor Lezsák bu mənalı hədiyyənin Hungarikum Ligetə qazandırılmasına görə Sultan Raevə və Qırğızıstan Milli Manas Teatrına təşəkkür edib. Yurtanın (çadırın) qırğız xalqının macar xalqına hədiyyəsi olaraq ziyarətçilərin üzünə açıq qalacağını bildirən Lezsák onun iki xalq arasındakı dostluğun daimi rəmzi olacağını vurğulayıb.
Taxta karkası və keçə örtüyü ilə qırğızların köçəri həyat mədəniyyətini əks etdirən yurta yalnız yaşayış məkanı deyil, həm də ailə həyatının, qonaqpərvərliyin və ənənəvi xalq sənətkarlığının bir araya gəldiyi bir məkan kimi əhəmiyyət daşıyır. Hungarikum Ligetdə qurulan yurta ziyarətçilərə bu mədəni irsi yerində tanımaq imkanı yaradacaq.
Çıxışdan sonra lent kəsilərək yurtanın rəsmi açılışı həyata keçirilib. Qırğızıstanlı sənətçilər dastan və şeir nümunələri ilə yanaşı, ənənəvi komuz musiqi alətinin müşayiəti ilə müxtəlif əsərlər ifa ediblər. Musiqi və şifahi xalq ədəbiyyatının bir araya gəldiyi proqram çərçivəsində dəvətlilər yurtanı gəzərək qırğızların ənənəvi yaşayış məkanı ilə yaxından tanış olublar.
İştirakçılara qurudulmuş meyvələr və qırğız mədəniyyətinə xas təamlar da təqdim edilib. Beləliklə, açılış mərasimi ziyarətçilərin qırğız mədəniyyətini memarlığı, musiqisi və qonaqpərvərliyi ilə birlikdə yaxından tanıdıqları bir görüşə çevrilib.
Baş katib Sultan Raevin təşəbbüsü ilə Hungarikum Ligetə qazandırılan çadır qırğız xalqının macar xalqına dostluq hədiyyəsi olaraq ziyarətçilərini qəbul etməyə davam edəcək.
Media Qalereyası
(9)
