IV TURKSOY Turkiy dunyo talabalar teatr festivalida "Turkiston tabibi" spektakli sahnalashtirildi
Xalqaro turkiy madaniyat tashkiloti — TURKSOY yetakchiligida hamda TİKA, Xoja Ahmad Yassaviy nomidagi Xalqaro turk-qozoq universiteti, Turkiston viloyati hokimligi, Turkiston shahar hokimligi va Qozog‘iston Respublikasi Madaniyat va axborot vazirligi ko‘magida tashkil etilgan IV TURKSOY Turkiy dunyo xalqaro talabalar teatr festivalida O‘zbekiston Davlat san’at va madaniyat instituti tomonidan sahnalashtirilgan "Turkiston tabibi" (Türkistan Tabibi) nomli komediya spektakli tomoshabinlar e’tiboriga taqdim etildi.
O‘zbekiston Respublikasi Madaniyat vazirligi qo‘llab-quvvatlovi ostida Institutning Teatr san’ati fakulteti talabalari tomonidan sahnalashtirilgan ushbu nodir asar festival doirasida tomoshabinlarga havola qilindi.
O‘zbek teatri va dramaturgiyasining tamal toshini qo‘ygan buyuk siymolardan biri Mannon Uyg‘ur tomonidan 1918-yilda qalamga olingan ushbu bir pardali komediya o‘z davrining dolzarb ijtimoiy muammolari, jaholat, nodonlik va soxta "ziyolilar" qiyofasini hajviy hamda pinhona pafos tili bilan ayovsiz tanqid ostiga oladi. Asardagi "tabib" tushunchasi va obrazi faqatgina jismoniy xastaliklarni davolovchi shaxsni emas, balki aql, ma’rifat va haqiqat yog‘dusi bilan jamiyatning ma’naviy illatlariga to‘g‘ri tashxis qo‘yib, ularni ma’rifat bilan davolaydigan ramziy timsolni anglatadi.
Teatr san’atini ma’rifat va ma’naviy yuksalish vositasi deb bilgan Mannon Uyg‘urning ushbu asari oradan bir asrdan ziyod vaqt o‘tganiga qaramay, o‘zining dolzarbligini yo‘qotmagan umuminsoniy g‘oyalari bilan tomoshabinlarni ham kuldirib, ham chuqur mushohada yuritishga chorladi.
Talabalardan yuksak va mahoratli sahna ijrosi
Badiiy rahbar hamda rejissyor, dotsent Farrux Egamberdiyev hamda rejissyor assistenti, katta o‘qituvchi Sohibjon Valiyev tomonidan taqdim etilgan spektaklda iqtidorli talabalardan iborat katta ijodiy jamoa ajoyib sahna mahoratini namoyish etdi.
Spektaklda obrazlarni gavdalantirgan va ijodiy jamoada xizmat qilgan ishtirokchilar tarkibi:
Tabib: Quvonchbek Ma’rupov
Xizmatkor: Bahrom Ro‘zimboyev
Ayniso: Shohinabonu Ashilova
Beva ayol: Madinaxon Abdusamatova
Bemorlar: Serdarbek Qudratov, Abdulaziz G‘ulomov, Shohjahon Haqberdiyev
Masxarabozlar / Qiziqchilar: Nigora Sanatjonova, Zarina Usmanova, Rayhona Shamsiddinova, Sabina Shamsiddinova
Spektaklning sahna bezaklari va vizual dizaynida sahna rassomi Alisher To‘laboyev, ovoz va musiqiy bezagida esa Dilshodbek Amrullayev mas’ul bo‘ldilar. Aktyorlarning grim va yuz pardozi ishlari Robiya Rizoyeva hamda 4-bosqich talabalari tomonidan ajoyib mahorat bilan bajarildi.
Media galereyasi
(12)
