TÜRKSOY-un Baş katibi Sultan Raevin 29 Oktyabr – Respublika Günü münasibətilə təbrik mesajı

Türk Dünyasının dəyərli nümayəndələri, əziz qardaşlarım!

Bu gün Türkiyə Cümhuriyyətinin yaradılmasının 103-cü ildönümünü qeyd etməyin qürur və sevincini hamımız birlikdə yaşayırıq. Qazi Mustafa Kamal Atatürkün rəhbərliyi ilə 29 oktyabr 1923-cü ildə elan edilən Cümhuriyyət yalnız bir dövlətin qurulmasını deyil, həm də müstəqillik və azadlıq uğrunda aparılan böyük mübarizənin qələbəsini təcəssüm etdirir.

Türkiyə Cümhuriyyəti yarandığı gündən ötən 103 il ərzində Türk Dünyasının ortaq qürur mənbəyi və aparıcı qüvvəsi olmuşdur. Qardaş xalqların hər zaman yanında dayanmış, çətin günlərdə onlara dəstək olmuş, ortaq mədəniyyətimizin və tariximizin qorunmasında öncül rol oynamışdır. Bu gün də Türkiyə güclü mövqeyi və zəngin mədəniyyəti ilə Türk Dünyasının birliyinə töhfə verməkdə davam edir.

Beynəlxalq Türk Mədəniyyəti Təşkilatı TÜRKSOY olaraq biz də Türk Dünyasının böyük mütəfəkkiri Çingiz Aytmatovun ifadə etdiyi kimi, “Artıq birlik və bərabərlik zamanıdır” şüarı ilə fəaliyyət göstəririk. Aytmatovun da vurğuladığı kimi, birliyini təmin etməyən xalqların daim təzyiq altında qalacağı həqiqətindən çıxış edərək, ortaq Türk Dünyasının zəngin mədəni irsini, tarixini və dəyərlərini gələcək nəsillərə çatdırmaq məsuliyyətini daşıyırıq. Cümhuriyyətin bizə qazandırdığı müstəqillik, birlik və həmrəylik ruhu Türk Dünyasının hər bir guşəsində əks-səda doğurur.

Bu əlamətdar gün münasibətilə, ilk növbədə, Qazi Mustafa Kamal Atatürk və onun silahdaşları başda olmaqla, Cümhuriyyətin qurulmasında əməyi olan bütün qəhrəmanlarımızı rəhmət və minnətdarlıqla yad edirəm. Türkiyə Cümhuriyyətinin 103-cü ildönümü münasibətilə ən səmimi təbriklərimi çatdırır, bu müqəddəs bayramın bütün Türk Dünyasına sülh, əmin-amanlıq və rifah gətirməsini arzulayıram.

Cümhuriyyət Bayramımız mübarək olsun!

Sultan RAEV

TÜRKSOY-un Baş katibi