TÜRKSOY-un Baş katibi Sultan Raev Türk Dövlətləri Təşkilatının Xarici İşlər Nazirləri Şurasının iclasında iştirak edib
TÜRKSOY-un Baş katibi Sultan Raev onu müşayiət edən nümayəndə heyətinin üzvləri ilə birlikdə Türk Dövlətləri Təşkilatının (TDT) XIII Zirvə görüşü çərçivəsində Ankarada keçirilən Xarici İşlər Nazirləri Şurasının iclasında iştirak edib. Raev iclasda etdiyi çıxışında Türk Dünyasında mədəni əməkdaşlığın inkişaf etdirilməsi və TÜRKSOY-un institusional strukturunun gücləndirilməsi istiqamətində görülən işlərə diqqət çəkib.
29 oktyabr 2026-cı il tarixində Prezident Kompleksində Türkiyə Respublikasının xarici işlər naziri Hakan Fidanın ev sahibliyi ilə keçirilən iclasda TDT-yə üzv və müşahidəçi ölkələrin nümayəndələri, eləcə də Türk Əməkdaşlıq Təşkilatlarının yüksəksəviyyəli rəhbərləri iştirak ediblər.
İclasda iştirakçılara müraciət edən TÜRKSOY-un Baş katibi Sultan Raev 29 Oktyabr – Respublika Bayramı münasibətilə təbriklərini çatdıraraq, tədbirə ev sahibliyi etdiyinə görə Türkiyə Respublikasına təşəkkür edib. Zirvə görüşünün “Türk əsri: Dildə, fikirdə, işdə birlik” mövzusunun TÜRKSOY-un otuz ildən artıqdır həyata keçirdiyi mədəni əməkdaşlığın əsas prinsiplərini əks etdirdiyini bildirən Raev, İsmayıl Qaspıralının irəli sürdüyü birlik ideyasının bu gün də Türk Dünyasında ortaq fəaliyyətə istiqamət verdiyini vurğulayıb.
TÜRKSOY-un mədəniyyət və incəsənət sahəsindəki fəaliyyətlərindən bəhs edən Raev Türk Dünyasının Mədəniyyət Paytaxtı proqramı çərçivəsində 2026-cı ildə Özbəkistanın Əndican şəhərində keçirilən tədbirləri xatırladaraq, 2027-ci ildə bu adı daşıyacaq Kayseri şəhərinə bütün iştirakçıları dəvət edib. Türkiyə Respublikasının təklifi ilə elan olunan 2026-cı il Ziya Göyalpın Anım İli çərçivəsində həyata keçirilən tədbirlərə də toxunan Raev böyük mütəfəkkirin anadan olmasının 150-ci ildönümündə onun Türk Dünyasının ortaq mənsubiyyət və birlik düşüncəsinə verdiyi töhfələrin bir daha yad edildiyini bildirib. Raev, həmçinin 2028-ci ildə Çingiz Aytmatovun anadan olmasının 100-cü ildönümünü birgə fəaliyyətlər çərçivəsində beynəlxalq səviyyədə qeyd etməyi hədəflədiklərini diqqətə çatdırıb.
Çıxışında TÜRKSOY-un institusional inkişafı məsələsinə də toxunan Baş katib Raev 2025-ci ildə Azərbaycanın Qəbələ şəhərində keçirilən TDT-nin XII Zirvə görüşündə dövlət başçıları tərəfindən TÜRKSOY-un inkişaf etdirilməsi və gücləndirilməsi istiqamətində nümayiş etdirilən siyasi iradənin Təşkilatın gələcəyi baxımından böyük əhəmiyyət daşıdığını vurğulayıb. Bu istiqamətdə TÜRKSOY Daimi Şurasının qərarları çərçivəsində üzv ölkələrin müvafiq qurumları ilə məsləhətləşmələrin davam etdirildiyini bildirən Raev Türk Əməkdaşlıq Təşkilatları ilə sıx əlaqələndirilmiş şəkildə fəaliyyət göstərməyə xüsusi önəm verdiklərini qeyd edib.
Zirvə görüşünün mövzusunda əks olunan “işdə birlik” anlayışına diqqət çəkən Sultan Raev deyib: “Məqsədimiz ortaq düşüncələrimizi konkret fəaliyyətlərə və qalıcı əsərlərə çevirməkdir”.
Zirvə görüşündə iştirak edən TÜRKSOY nümayəndə heyətinin üzvləri arasında TÜRKSOY-un Baş katibinin müavini Sayit Yusuf və departament müdiri Salim Ezer də yer alıblar.
Türk dövlətlərinin liderləri 34 ildən sonra yenidən Ankarada bir araya gəlirlər
Türk Dövlətləri Təşkilatının XIII Zirvə görüşü 30 oktyabr 2026-cı il tarixində Türkiyə Respublikasının Prezidenti Rəcəb Tayyib Ərdoğanın ev sahibliyi ilə Ankarada keçiriləcək.
İlk Türkdilli Ölkələrin Dövlət Başçıları Zirvə görüşünün 1992-ci ildə Ankarada keçirilməsindən 34 il sonra türk dövlətlərinin liderləri “Türk əsri: Dildə, fikirdə, işdə birlik” mövzusu ilə yenidən Ankarada bir araya gələcəklər.
Zirvə görüşündə türk dövlətləri arasında siyasi, iqtisadi və mədəni əməkdaşlığın inkişaf etdirilməsi, ortaq layihələrin gücləndirilməsi və Türk Dünyasının gələcəyinə dair strateji prioritetlərin müzakirə olunması gözlənilir. Zirvə çərçivəsində Ankara Bəyannaməsinin və Təşkilatın institusional inkişafına dair müxtəlif qərarların qəbul edilməsi nəzərdə tutulur.
Media Qalereyası
(9)
