― 29 апреля 2025 г.

TÜRKSOY Bosh kotibi Sulton Raev va Vengriya Madaniyat va innovatsiyalar vaziri Balaj Xanko Budapeshtda uchrashdi

Budapesht, 2025-yil 29-aprel — Vengriya-Turk madaniyat, oliy ta’lim va innovatsiyalar sammiti doirasida TÜRKSOY Bosh kotibi Sulton Raev va Vengriya Madaniyat va innovatsiyalar vaziri Balaj Xanko o‘rtasida ikki tomonlama uchrashuv bo‘lib o‘tdi. Uchrashuv chog‘ida tomonlar madaniy hamkorlikni yanada chuqurlashtirish borasidagi qat’iy niyatlarini tasdiqladilar.

Vazir Xanko suhbat avvalida Sulton Raevni sammitda qabul qilayotganidan mamnunligini izhor etib, Vengriya TÜRKSOY bilan barcha sohalarda hamkorlikka ochiq ekanini alohida ta’kidladi. U Vengriya bilan Turk dunyosi o‘rtasidagi tarixiy va madaniy rishtalarni eslab, bu aloqalar bugungi kunda institutsional hamkorlik orqali yanada mustahkamlanayotganini bildirdi.

Uchrashuv davomida so‘nggi yillarda TÜRKSOY bilan Vengriya muassasalari o‘rtasida amalga oshirilgan muvaffaqiyatli loyihalar ham tilga olindi. Xususan, shoir Shandor Petefi tavalludining 200 yilligiga bag‘ishlab o‘tkazilgan xalqaro she’r tarjima tanlovi va Petefi mavzusidagi rassomlar uchrashuvi vazir Xanko tomonidan yuqori baholandi. Ushbu loyihalarga oid TÜRKSOY tomonidan tayyorlangan ma’lumotnoma ham uchrashuvda muhokama qilindi.

Madaniy diplomatiya yo‘nalishida TÜRKSOY faoliyatining ahamiyatini e’tirof etgan vazir Xanko, 2019 va 2022-yillarda imzolangan hamkorlik protokollarining samaradorligini qayd etdi hamda bu aloqalarni institutsional asosda barqaror davom ettirish zarurligiga urg‘u berdi.

Bosh kotib Sulton Raev esa Vengriyaning Turk madaniyatiga bo‘lgan qiziqish va yordamini doimo katta mamnuniyat bilan qarshi olishlarini ta’kidladi. U Vengriyaning turkologiya fanining shakllanishidagi yetakchi roliga e’tibor qaratib, bugungi madaniy hamkorlik aynan shu tarixiy asosda rivojlanayotganini va qo‘shma loyihalar ayni shu mustahkam zamin ustida bunyod etilayotganini bildirdi.

Tomonlar kelgusi davrda yangi qo‘shma harakatlar rejasini ishlab chiqish va madaniyat sohasida amaliy hamkorlikni kengaytirish masalasida o‘zaro kelishuvga erishdilar.