― 20 апреля 2026 г.

Toshkentda Xalqaro san’at festivali boshlandi

20-aprel kuni Toshkentda, O‘zbekiston Badiiy akademiyasi mezbonligida tashkil etilgan “Xalqaro tasviriy va amaliy san’at festivali” tantanali ravishda ochildi. Ochilish marosimida O‘zbekiston Respublikasi Madaniyat vaziri Ozodbek Nazarbekov ishtirok etdi.

Tadbirda so‘zga chiqqan O‘zbekiston Badiiy akademiyasi raisi Akmal Nuridinov madaniyat va san’at sohasini qo‘llab-quvvatlayotgani uchun O‘zbekiston Respublikasi Prezidenti Shavkat Mirziyoyevga minnatdorlik bildirdi.

Akmal Nuridinov o‘z nutqida: “Prezidentimizning san’at va san’at ahliga ko‘rsatayotgan e’tibori biz uchun yuksak sharafdir. Shavkat Mirziyoyev madaniyat va san’at masalalarini har doim ustuvor vazifalar qatorida tutib kelmoqda. Shuningdek, TURKSOY boshchiligidagi barcha hissa qo‘shgan tashkilotlarga tashakkur aytamiz. Festivalimiz yildan-yilga rivojlanib, ko‘lami kengayib bormoqda”, — deya ta’kidladi.

Ochilish marosimi konsert dasturi bilan davom etdi. San’atkorlar Dilmurod Mahmudov va Shuhrat Rasulbek o‘z chiqishlarini namoyish etgan bo‘lsa, defile doirasida o‘zbek milliy liboslari tomoshabinlar e’tiboriga havola qilindi.

Festival doirasida yaqin kunlarda konferensiyalar, ko‘rgazmalar va mahorat darslari o‘tkazilishi rejalashtirilgan. Joriy yilda tadbirda Xitoy, Koreya, Ruminiya, Rossiya va TURKSOYga a’zo mamlakatlardan 80 ga yaqin mehmon ishtirok etmoqda.

20-aprel kuni o‘z ishini boshlagan festival to‘rt kun davom etishi ko‘zda tutilgan.