― 19 июня 2025 г.
XXVI TÜRKSOÝ Opera Günleriniň çäklerinde Almaty şäherinde gala konsert geçirildi
Türki medeniýetiň halkara guramasy (TÜRKSOÝ) tarapyndan gurnalan XXVI TÜRKSOÝ Opera Günleri çäginde, Gazagystanyň Almaty şäherindäki Abai Gazak Milli Opera we Balet teatrynda dabaraly gala konsert geçirildi.
TÜRKSOÝ-yň baştutanlygynda geçirilen bu ähmiýetli medeni çäre, Türki Dünýäsiniň ýurtlarynyň arasynda medeni hyzmatdaşlygy pugtalandyrmagy we sungatyň üsti bilen dostluk gatnaşyklaryny berkitmegi maksat edinýär.
Gala konserte Gazagystan, Türkiýe, Özbegistan we Gyrgyzystandan belli opera sungatçylary gatnaşdylr. Maksatnamada Abai Gazak Milli Opera we Balet teatrynyň simfoniki orkestri we akademiki hor topary sahna çykdy. Sungatçylar milli we dünýä klasikasyndan saýlanyp alnan arýalary ussatlyk bilen ýerine ýetirip, tomaşaçylara ýatdan çykmajak bir agşam sowgat etdiler.
Konsertde Gazagystanyň meşhur sungatçylary Erbolat Ahmedýarow we Kuanyş Ismailow, şeýle-de Gyrgyz Milli Akademiki Opera we Balet teatrynyň baş dirižýory Zahar Butenko orkestr ýolbaşçylygyny öz üstlerine aldylar. Maksatnamanyň açylyşy gazak kompozitory Ýewgeniý Brusilowskiýiň “Kyz Jibek” operasyndan alnan bir bölüm bilen başlandy.
Çäräniň çäklerinde teatryň foýesinde, Türki Dünýäsiniň ýurtlaryna degişli opera we balet teatrlaryny tanyşdyrýan sergilere hem giň orun berildi.
TÜRKSOÝ-yň Baş sekretary Sultan Raýew, bu çäre mynasybetli ýollan gutlag ýüzlenmesinde şeýle sözlere ýer berdi:
“Sungat — serhetleri aşýan, halklary birleşdirýän älemleýin bir dildir. Ol ýürekleri baglanyşdyrýan köprüleriň iň güýçli sütünidir. XXVI Opera Günleriniň çäklerinde Türki Dünýäsiniň dürli künjeklerinden gelen sungatçylarymyzyň döreden bu ýokary hilli sungat bileleşigi we paýlaşygy biz üçin uly buýsanç çeşmesidir. Bu gymmatly çärä gatnaşan ähli edaralara we sungatçylarymyza çäksiz minnetdarlygymy bildirýärin.”
Almaty şäherindäki bu gala konsert, sungatyň birleşdiriji güýjüni görkezýän täsirli medeni duşuşyk bolup, Türki Dünýäsiniň sahna sungaty taryhynda öz ornuny aldy.
