― 15 августа 2025 г.
Türki Dünýäsiniň Ýaş Zehinleri Aktau şäherinde duşuşdy
2025-nji ýylyň 14–18 awgust aralygynda, Türk Dünýäsiniň Medeni Paýtagty diýlip saýlanan Gazagystanyň Aktau şäheri, reňkli bir sungat baýramyna öý eýeçiligi edýär. TÜRKSOÝ, Mangystau welaýat häkimligi, Aktau şäher häkimligi we Abaý Medeniýet Merkezi bilen hyzmatdaşlykda guralan “Zehinli Ýurt” Halkara Çagalar Sungat Festiwaly, Türki Dünýäsiniň dürli künjeklerinden gelen 500-e golaý çagany bir ýere jemleýär.
Açylyş dabarasy 15-nji awgustda Abaý Medeniýet we Dynç alyş toplumynda geçirildi. Özbegistan, Gyrgyzystan, Tatarystan, Başgyrdystan, Türkiýe, Tuwa, Krym, Türkmenistan we Gazagystanyň dürli sebitlerinden gelen ýaş zehinler, festiwal dowamynda halk tanslarynda, halk saz gurallarynda ýerine ýetirişde, däp bolan we häzirki zaman wokal çykyşlarynda hem-de horeografiýa ugrundaky başarnyklaryny görkezerler.
Açylyş dabarasyna TÜRKSOÝ-yň Baş sekretary Sultan Raýew hem-de Aktau şäher häkiminiň orunbasary Jüsupow Bekzat Bagbergenuly gatnaşyp, bäsleşijilere üstünlik arzuw etdiler.
TÜRKSOÝ-yň Baş sekretary Sultan Raýew açylyş sözünde, çagalaryň sungat arkaly özüni beýlekilere beýan etmeginiň möhümdigini belläp şeýle diýdi:
“Zehinli Ýurt Halkara Çagalar Sungat Festiwaly — tans, saz, aýdym we şekil sungaty boýunça zehinli çagalarymyzynyň duşuşýan manyly meýdançasydyr. Çagalar — geljegimizdir. Olaryň zehinleriniň ýüze çykarylmagy, sylaglanmagy we goldanylmagy ösüş ýolunda şahsyýetleriniň kemala gelmegine ýardam edýär. Çagalyk döwründe gazanylan üstünlikler, ömür boýy yz galdyrýar. Bu festiwala goldaw beren ähli guramalara minnetdarlyk bildirýärin, ýaşlarymyza üstünlik arzuw edýärin.”
Festiwal çäklerinde ýaş artistler dört ugurda bäsleşýärler:
- Halk saz gurallarynda ýerine ýetiriş
- Halk wokaly
- Estrada (pop) wokaly
- Horeografiýa
Ilkinji gün geçirilen “Halk Saz Gurallarynda Ýerine Ýetiriş” we “Halk Wokaly” bäsleşikleri, öz ugrundan belli sungat işgärleriniň gatnaşmagyndaky eminler topary tarapyndan baha berildi.
Bäş gün dowam edilmegi meýilleşdirilýän festiwal döwründe, şeýle hem “Däp bolan çagalar oýunlary” mowzugyndaky halkara şekil çekiş bäsleşiginiň baýrak gowşurylyş dabarasy, dürli ýurtlardan gelen ýaş artistleriň gatnaşmagynda döredijilik sapaklary we medeniýetara gatnaşyklara degişli çäreler geçiriler.
Türki dünýäsiniň ýaş zehinlerini duşuşdyrýan “Zehinli Ýurt” festiwaly, 18-nji awgustda geçiriljek gala konserti bilen tamamlanar we “Iň gowy” adyny alan ýeňijiler yglan ediler.
