― 7 марта 2026 г.

Baş Sekretar Sultan Raýew: Türki dünýäsiniň paýhasly we asylly zenanlaryna

Türki dünýäsiniň paýhasly we asylly zenanlaryna,

Bu gün biz diňe senenamalarda bellenýän bir senäni däl, eýsem gadymy özgerişimiziň binagärleri, umumy medeniýetimiziň sarsmaz daýançlary hem-de ýagty geljegimiziň iň ygtybarly kepilleri bolan zenanlarymyza hormat bildirmegiň buýsanjyny başdan geçirýäris.

Türki dünýäsiniň zenany taryhyň ähli döwürlerinde diňe bir ýanýoldaş ýa-da ene hökmünde däl, eýsem döwletiň binýadyndaky berk sütün, obanyň jebisligindäki paýhasly ýol görkeziji hem-de garaşsyzlyk ugrundaky göreşlerde gahryman hökmünde çykyş edipdir. Altaýlardan Anadola, Taňrydaglardan Balkanlara çenli uzalyp gidýän bu giň geografiki giňişlikde Tomiris Hatynyň batyrlygy, Haýme Enäniň döwlet gurujy paýhasy, Kurmanjan Datkanyň diplomatiki zehini, Nene Hatynyň garşylygy we Süýümbike hanyň asyllylygy bir ruhda birleşýär.

Medeniýetimiziň iň mukaddes gymmatlyklarynyň biri bolan “Ene dilimizi” hüwdüleri bilen ýüregimize siňdirýän, däp-dessurlarymyzy hem-de milli gymmatlyklarymyzy nesilden-nesle geçirýän türki dünýäsiniň zenany, TÜRKSOÝ tarapyndan alnyp barylýan umumy türki dünýäsi medeniýeti boýunça işleriň hem iň esasy birleşdiriji güýjüdür. Zenanlarymyzyň mylaýymlygy, akyly we tutanýerliligi bilen kemala gelen jemgyýetiň hemişe has adalatly, has güýçli we has parahat boljakdygyna ynanjymyz berkdir.

Şu manyly gün mynasybetli Adriatik deňzinden Hytaýyň beýik diwaryna çenli uzalyp gidýän giň giňişlikde Türki dünýäsiniň birligini, jebisligini we medeni baýlygyny egninde göterýän ähli zenanlarymyzyň 8-nji Mart – Halkara Zenanlar Gününi tüýs ýürekden gutlaýaryn.

Siziň barlygyňyz dünýäni has owadan edýär, tutanýerliligiňiz bolsa umumy geljegimizi ýagtyldýar.

Sultan RAÝEW

TÜRKSOÝ-yň Baş Sekretary