― 16 июня 2025 г.

Aktau şäherinde Açyk Howada Gala Konsert bilen Halkara Festiwal tamamlandy

Aktau şäheriniň “Türki dünýäsiniň Medeniýet paýtagty” diýip yglan edilmegi mynasybetli gurnalan Halkara Halk Aýdym-saz Toparlary we Halk Saz Gurallarynyň Ýerine Ýetirijileri Festiwaly üç gün dowam eden joşgunly çäreleriň yzy bilen şowhunly gala konsert bilen tamamlandy.

Mangistau welaýatynyň Jemgyýetçilik gatnaşyklary merkeziniň habar bermegine görä, festiwal uly gyzyklanma we köpçülikleýin gatnaşnaşyk esasynda geçirildi.

Gala konsertde Eýran, Gyrgyzystan, Özbegistan, Russiýa, Atyrau we Kyzylorda şäherlerinden gelen sungat toparlary sahna çykyp, ýurtlarynyň we sebitleriniň baý aýdym-saz mirasyny üstünlikli görnüşde görkezdiler. Çärä gatnaşan artistler ýokary hilli çykyşlary bilen tomaşaçylaryň çyn ýürekden el çarpyşmalaryna mynasyp boldy.

Festiwalyň ýapylyşy mynasybetli telegram iberen TÜRKSOÝ-yň Baş sekretary Sultan Raýew, Halkara Halk Aýdym-Saz Toparlary we Halk Saz Gurallarynyň Ýerine Ýetirijileri Festiwalyň Türki dünýäsiniň umumy medeni mirasyny tanatmak we geljek nesillere geçirmek nukdaýnazaryndan aýratyn ähmiýetlidigini belledi. Türki Dünýäsiniň medeniýet paýtagty hökmünde saýlanan Aktau şäherinde gurnalan bu ýokary hilli çäre ýylyň dowamynda geçiriljek medeni çäreler üçin güýçli başlangyç bolandygyny aýdyp, şeýle diýdi:

“Türki Dünýäsiniň gadymy saz däp-dessurlary her sebitiň özboluşly reňklerini görkezýän nagmalar arkaly emele gelip, ýerli derejeden äleme ýaýran ajaýyp medeni köpri döredýär. Bu festiwal diňe bir sazly baýramçylyk däl, eýsem halklarymyzyň arasynda birek-birege düşünmegi, doganlygy we umumy medeni taýdan ýakynlygy berkitýän manyly duşuşykdyr. Aktau şäherinde ýylyň dowamynda dowam etjek bu medeni çäreler bilen agzybirligimizi has-da güýçlendirjekdigimize ynanýaryn. Bu mümkinçilikden peýdalanyp, festiwalyň gurnalmagynda zähmet çeken ähli edaralara we artistlere tüýs ýürekden minnetdarlygymy bildirýärin.”

Gala konsertde çykyş eden Atırau welaýatynyň etno-folklor topary “Sarmad”-yň agzasy Akböken Temir bu dabaraly çäre babatynda öz sözlerinde şeýle diýdi: “Iki günüň dowamynda Aktau halky çykyşlary uly üns we gyzyklanma bilen diňledi. Biz hem bu gün öz kompozisiýalarymyz bilen birlikde halk kompozitorlarynyň eserlerini döwrebap usulda ýerine ýetirdik. “Alaş Amanaty”, “Kenesary”, “Kasym Han” we halk aýdymy “Agugaý” ýaly eserleri ýerine ýetirdik. Aktau halkynyň gyzyklanmasy we ruhubelentligi bizi çuňňur täsir etdi.”

Festiwalyň ahyrynda Aktau şäheriniň häkimi Abylhaýyr Baýpakow we TÜRKSOÝ-yň wekili Arman Nurmahamatuly festiwala goşant goşan artistlere ýörite minnetdarlyk hatlaryny we ýadygärlik sowgatlaryny gowşurdy.

TÜRKSOÝ-yň Aktau şäherindäki medeni çäreleri “Türki Dünýäsiniň Medeni Paýtagty” maksatnamasynyň çäklerinde ýylyň dowamynda dowam eder.