― 5 февраля 2026 г.

YTB KATİP делегациясы ТҮРКСОЙ Бас хатшылығына келді

Шетелдегі түріктер және туыстас қауымдастықтар басқармасы (YTB) жүзеге асырып жатқан Мемлекеттік қызметшілер мен ғалымдарға арналған Түрікше байланыс бағдарламасы (KATİP) аясында Түркияда жүрген делегация Халықаралық ТҮРКСОЙ түркі мәдениеті ұйымының Бас хатшылығына арнайы барды.

Әлемнің түкпір-түкпірінен келген қатысушылар сапар барысында түркі мәдениеті мен өнерін жақыннан танысып, ТҮРКСОЙ Бас хатшысының орынбасары Сайит Юсуфпен кездесіп, сұхбаттасты. 

Кездесу барысында Тәжікстаннан Ливияға, Замбиядан Балқан елдеріне созылған елдерден келген қатысушылармен жеке-жеке тілдескен Сайит Юсуф студенттердің түрік тілін меңгеру үдерісі мен Түркияда жинақтаған тәжірибелері туралы ақпарат алды. Ол тіл үйренуде батылдықтың маңыздылығына назар аударып, қорықпай сөйлеу мәдени жақындасудың негізгі алғышарттарының бірі екенін атап өтті.

Сайит Юсуф: «Таныстық – дұшпандықты жояды»

Жиын барысында сөз сөйлеген ТҮРКСОЙ Бас хатшысының орынбасары Сайит Юсуф адамдардың бір-бірін тануы жаһандық бейбітшілік пен өзара түсіністік тұрғысынан да аса маңызды екенін айтты.

Өз сөзінде ол: «Әлемдегі барлық жамандықтың түп-төркіні – жатсыну, яғни адамдардың бір-бірін танымауында жатыр. Бірін-бірі танымайтындар сөйлеспейді, бір-бірінің тарихын білмейді. Ал таныстық пен достық орнаған жерде дұшпандық болмайды. Адам – қасиетті жаратылыс. Қарым-қатынастағы кедергілер жойылғанда, халықтар арасындағы мәселелердің қаншалықты жасанды екені анық көрінеді. Сіздер мұнда тек бір тілді ғана үйреніп жатқан жоқсыздар, сонымен қатар елдеріміз арасында өмір бойына жалғасатын рухани көпірлер орнатып отырсыздар», – деп атап өтті.

Сайит Юсуф қатысушыларға өз елдеріне қайтқаннан кейін де ТҮРКСОЙ ұйымын әрдайым есте сақтап, жобаларына қосып жүруге кеңес берді.

Сапар қатысушылардың сұрақтарына жауап беріліп, естелік суретке түсуімен қорытындыланды.