― 24 марта 2026 г.

ТҮРКСОЙ мен Солтүстік Македонияның Мәдениет және туризм министрлігі арасында ынтымақтастық туралы хаттамаға қол қойылды

ТҮРКСОЙ Бас хатшылығында Халықаралық ТҮРКСОЙ түркі мәдениеті ұйымы мен Солтүстік Македония Республикасы Мәдениет және туризм министрлігі арасында ынтымақтастық туралы хаттамаға қол қойылды.

Рәсімге Солтүстік Македонияның Мәдениет және туризм министрі Зоран Людков, ТҮРКСОЙ Бас хатшысы Сұлтан Раев, Солтүстік Македонияның Анкарадағы Төтенше және Өкілетті Елшісі, Македонияның туризм жөніндегі ұлттық үйлестірушісі Аккан Махмут және басқа да арнайы қонақтар қатысты.

Салтанатты жиында сөз сөйлеген ТҮРКСОЙ Бас хатшысы Сұлтан Раев меморандумның екі мекеме арасындағы ынтымақтастық құжаты ғана емес, сонымен қатар халықтар арасындағы мәдени жақындасуды нығайтуға, мәдени мұраны насихаттауға бағытталған маңызды қадам екенін атап өтті.

Раев Солтүстік Македонияның көптілді, көпдінді және көпмәдениеттілігімен ерекшеленетінін жеткізіп: «Әртүрлі болмыстардың өзара құрмет пен түсіністік негізінде бір қоғамда өмір сүруі – тек өңірлік қана емес, жаһандық деңгейде де ерекше мән беруді қажет ететін құнды тәжірибе», – деді.

Сондай-ақ Бас хатшы Раев Солтүстік Македонияда тұратын түрік қауымдастығының тарихи әрі мәдени мұрасымен түркі әлемінің ажырамас бөлігі екенін және түрлі мәдениеттер арасында байланыстырушы көпір рөлін атқаратынын атап өтті.

Өз кезегінде Солтүстік Македонияның Мәдениет және туризм министрі Зоран Людков екі ел арасындағы достық қатынастардың мәдени саладағы ынтымақтастық арқылы одан әрі нығайып келе жатқанын айтты. Ол қол қойылған хаттама халықтардың бір-бірін тереңірек тануына, мәдени мұраны қорғауға және өнер қайраткерлері арасындағы өзара ықпалдастықты арттыруға ықпал ететінін атап өтті.

Хаттама аясында мәдениет, өнер, әдебиет, сахна өнері, музей және кітапхана ісі, сондай-ақ мәдени мұра салаларында бірлескен жобаларды жүзеге асыру, өнер қайраткерлері мен мамандар алмасу бағдарламаларын ұйымдастыру және ақпарат алмасу тетіктерін қалыптастыру көзделген.

Жиын хаттамаға қол қойылғаннан кейін сыйлықтар табыстау және естелік суретке түсумен қорытындыланды.