― 30 марта 2024 г.

Сұлтан Раев 5-ші Дүниежүзілік көшпенділер ойындарын дайындау және өткізу жөніндегі дирекция басшылығының қабылдауында болды

Астанада Халықаралық ТҮРКСОЙ ұйымының Бас хатшысы Сұлтан Раев 5-ші Дүниежүзілік көшпенділер ойындарын дайындау және өткізу жөніндегі дирекция басшысының орынбасары Абылай Қондыбаевпен кездесті. Жиынға сондай-ақ Қазақстанның ТҮРКСОЙ-дағы өкілі Бақытжан Омар мен дирекция ұжымы қатысты.

Басқосуда  биыл қыркүйек айының 8-14-і аралығында өтетін көшпенділер ойыны талқыланды. Осы орайда Раев Қондыбаевқа шара бағдарламасына түркі елдерінің айтыскерлерінің қатысуымен "Халықаралық айтыс" және "Этномода" фестивалін ұйымдастыру жайлы ұсынысын айтты. Дирекция басшысының орынбасы бұл ұсынысты құба-құп көретінін, алда қажетті құжаттар мен дайындықтардың жүргізіп бастайтынын жеткізді.

Жиын соңында Раев Қондыбаевқа ТҮРКСОЙ табақшасын сыйға тартып, естелік суретке түсті.

Айта кетейік, ТҮРКСОЙ 2022 жылы Бурса қаласының Изник ауданында өткен 4-ші дүниежүзілік көшпенділер ойынының ашылу және жабылу салатанатын өткізуге ат салысқан болатын.