― 6 августа 2026 г.
Тышкы саясат институтунун өкүлдөрү ТҮРКСОЙдо
Тышкы саясат институтунун өкүлдөрү жана институттун стажёр студенттери ТҮРКСОЙдо болушту.
ТҮРКСОЙдун Анкара шаарындагы Башкы катчылыгында өткөн жолугушууда түрк дүйнөсүнүн келечеги, маданий дипломатия жана жаш муундардын түрк мамлекеттер менен болгон байланышын чыңдоо маселелери талкууланды. Конокторду ТҮРКСОЙдун Башкы катчысынын орун басары Сайит Юсуф кабыл алды.
«Жаш дипломаттарга түрк дүйнөсү тууралуу түшүнүк калыптандырууну максат кылабыз»
Жолугушууда сөз сүйлөгөн Тышкы саясат институтунун башкы координатору Жем Туна Аксу институттун жарым кылымдык ишмердүүлүгүнө токтолуп, 1974-жылы негизделгенден бери сертификаттык окууларды жана стажировка программаларын уюштуруп, түрк дипломатиясына, мамлекеттик башкаруу тармагына жана илимий чөйрөгө көптөгөн дипломаттар менен адистерди даярдап келгенин белгиледи.
Ал институттун негизги максаттарынын бири жаш изилдөөчүлөрдүн арасында түрк дүйнөсү тууралуу көз карашты калыптандыруу экенин айтып, төмөнкүлөрдү билдирди:
«Биз болочок дипломаттарыбыз менен жаш изилдөөчүлөрүбүздүн түрк дүйнөсүн, бул аймактагы маданий дипломатия иштерин жана ТҮРКСОЙ сыяктуу эл аралык уюмдардын ишмердүүлүгүн жакындан таанып-билишин каалайбыз. Эл аралык жана аймактык түзүмдөр менен катар түрк дүйнөсү менен болгон байланышыбызды да бекемдөө – келечектеги дипломаттар менен окумуштуулар үчүн өтө маанилүү милдет».
«Түрктүк – биологиялык эмес, маданий жана цивилизациялык түшүнүк»
ТҮРКСОЙдун Башкы катчысынын орун басары Сайит Юсуф өз сөзүндө «Түрк дүйнөсү» түшүнүгү убактылуу саясий ураандарга эмес, терең тарыхый жана социологиялык негиздерге таянарын белгиледи.
Анын айтымында, түрк дүйнөсүн бириктирип турган эң башкы күч – жалпы тил жана маданий мурас.
«Түрк дүйнөсү башка элдердин же цивилизациялардын биригүүсүнө салыштырмалуу өзгөчө жана терең түзүлүшкө ээ. Түрктүк түшүнүгүн биологиялык же этностук алкак менен гана түшүндүрүүгө болбойт. Ал – цивилизация, маданият жана руханий биримдик. Дүйнөнүн ар кайсы бурчтарына тараган, башка маданияттар менен өз ара байып келген бул чоң маданий мейкиндиктин эң бекем пайдубалы – миңдеген жылдардан бери уланып келе жаткан түрк тилинин мурасы. Бизди жалпы тарых, жалпы тил жана келечекке болгон орток ишеним бириктирет».
«Маданий дипломатия – келечектеги эң бекем байланыш»
Сайит Юсуф дүйнөдөгү өзгөрүп жаткан геосаясий шарттарда маданий дипломатиянын стратегиялык мааниси барган сайын күчөп жатканын белгилеп, саясий жана экономикалык кызматташтыктын узак мөөнөттүү пайдубалы дал ушул маданий байланыштар экенин айтты.
Ошондой эле ал жаштарга ТҮРКСОЙдун ишмердүүлүгү жана келечекке багытталган долбоорлору тууралуу маалымат берип:
«Түрк дүйнөсү жакынкы жылдары да, узак мөөнөттүү келечекте да актуалдуу багыт бойдон калат. Биз ТҮРКСОЙ катары музыка, искусство, театр, адабият жана жаштар долбоорлору аркылуу орток маданий мейкиндикти чыңдоону улантабыз. Жалпы мурасыбызды сактоо, өнүктүрүү жана кийинки муундарга жеткирүү үчүн мындан ары да бардык күч-аракетибизди жумшайбыз. Жаш изилдөөчүлөр менен болочок дипломаттардын биздин иш-чараларга активдүү катышуусу өзгөчө мааниге ээ», – деди.
Жолугушуунун соңунда Тышкы саясат институтунун стажёрлору жана студенттери ТҮРКСОЙ уюштурган эл аралык маданий, көркөм өнөр жана жаштар иш-чараларына катышуусу, ошондой эле биргелешкен долбоорлорду ишке ашыруу боюнча макулдашууга жетишилди.
Иш-чара суроо-жооп бөлүгү жана эстеликке жалпы сүрөткө түшүү менен жыйынтыкталды.
