― 1 июня 2026 г.

ТҮРКСОЙ «Түркмөн килеми» мамлекеттик бирикмесине атайын сыйлык тапшырды

Түркмөнстандын улуттук маданиятынын эң маанилүү символдорунун бири болгон түркмөн килемине арналган Түркмөн килеми майрамы быйыл да өлкөнүн борбору Ашхабад шаарында түрдүү маданий иш-чаралар менен белгиленди.

Түркмөн килемчилик өнөрүнүн тарыхый жана маданий баалуулуктарын чагылдырган майрамдык иш-чараларга мамлекеттик жетекчилер, дипломатиялык өкүлчүлүктөрдүн өкүлдөрү, маданият жана искусство ишмерлери, ошондой эле көптөгөн коноктор катышты.

Түркмөн килеминин кайталангыс үлгүлөрү көрсөтүлдү

Майрамдын негизги иш-чаралары өткөрүлгөн Түркмөн килеминин улуттук музейинде салттуу түркмөн килемдеринин мыкты үлгүлөрү жана килемчилик өнөрүнүн ар кыл доорлорун чагылдырган эмгектер көргөзмөгө коюлду.

Мындан тышкары келген конокторго түркмөн килеминин даярдалыш этаптары жана анын бай оймо-чиймелери тууралуу кеңири маалымат берилди.

Иш-чараларга Түркмөнстандын Меджлисинин төрайымы Дүйнөгөзөл Гулманова, Түркмөнстандын ЮНЕСКОнун иштери боюнча улуттук комиссиясынын жооптуу катчысы, элчи Чынар Рүстемова, «Түркмөн килеми» мамлекеттик бирикмесинин жетекчилери жана бир катар мамлекеттик мекемелердин өкүлдөрү катышышты.

Түрк дүйнөсүнүн жалпы маданий эс тутумунун баалуу бөлүгү

Майрамдык иш-чараларга катышкан Эл аралык nүрк маданияты уюму – ТҮРКСОЙдун Башкы катчысы Султан Раев өз сөзүндө түркмөн килеми Түркмөнстандын гана эмес, бүтүндөй nүрк дүйнөсүнүн орток маданий мурасынын эң баалуу бөлүктөрүнүн бири экенин белгиледи.

Анын айтымында, түркмөн килеминдеги оймо-чиймелер жана символдор түрк элдеринин тарыхын, эстетикалык дүйнөтаанымын жана жашоо философиясын бүгүнкү күнгө чейин жеткирип келет.

Султан Раев ошондой эле килемчилик салтын муундан муунга өткөрүп келүүдө түркмөн аялдарынын эмгеги өзгөчө мааниге ээ экенин баса белгиледи.

Башкы катчы түркмөн килемчилик өнөрүнүн ЮНЕСКОнун Адамзаттын материалдык эмес маданий мурасынын репрезентативдик тизмесине киргизилиши бул байыркы салттын эл аралык деңгээлде жогору баалангандыгынын айкын далили экенин айтты.

Ал ошондой эле Түркмөнстандын маданий мурасты сактоо жана өнүктүрүү багытындагы ишмердүүлүгүн жогору баалай турганын билдирди.

Усталардын эмгегине көрсөтүлгөн урмат-сый

Майрамдын алкагында ТҮРКСОЙ тарабынан түркмөн килемчилик өнөрүн сактоого, өнүктүрүүгө жана дүйнөлүк деңгээлде таанытууга кошкон олуттуу салымы үчүн «Түркмөн килеми» мамлекеттик бирикмесине атайын сыйлык тапшырылды.

Сыйлыкты тапшырган ТҮРКСОЙдун Башкы катчысы Султан Раев бул сыйлык бир гана мекемеге эмес, түркмөн килемчилик өнөрүн бүгүнкү күнгө чейин сактап келген бардык усталарга, кол өнөрчүлөргө жана эмгек адамдарına болгон урмат-сыйдын белгиси экенин белгиледи.

Раев бул байыркы өнөрдү колдоо мындан ары да улантыларын айтып, килемчилик өнөрүн келечек муундарга өткөрүп берүүгө чоң салым кошуп жаткан тажрыйбалуу усталарга ТҮРКСОЙдун атынан ыраазычылык грамоталарын тапшырды.

Эл аралык жыйын өткөрүлдү

Түркмөн килеми майрамынын алкагында ошондой эле Дүйнөлүк түркмөн килеми боюнча эксперттер ассоциациясынын 26-жыйыны өткөрүлдү.

Жыйында түркмөн килемчилигинин тарыхый өнүгүү жолу, көркөм өзгөчөлүктөрү жана дүйнөлүк маданий мурастагы орду ар тараптуу талкууланды.

Түрк дүйнөсүнүн жалпы маданий баалуулуктарын сактоо жана өнүктүрүү багытындагы кызматташтыкты чыңдоого багытталган иш-чаралар Түркмөнстандын белгилүү өнөр адамдарынын катышуусундагы салтанаттуу концерттик программа менен жыйынтыкталды.