― 13 августа 2026 г.
ТҮРКСОЙ менен Лакителек фонду уюштурган 20-Фотографтар жолугушуусу Венгрияда башталды
Эл аралык түрк маданияты уюму ТҮРКСОЙ менен Лакителек фондунун кызматташтыгында уюштурулган «ТҮРКСОЙдун 20-Фотографтар жолугушуусу» түрк дүйнөсүнүн ар кайсы аймактарынан келген сүрөтчүлөрдүн катышуусунда Венгрияда башталды.
ТҮРКСОЙ тарабынан салтка айланган иш-чара быйыл 20-жолу өткөрүлүп, маанилүү мааракеге жетти. Иш-чара 2026-жылдын 12–22-август күндөрү 11 күн бою уланат.
Жолугушуунун алкагында түрк дүйнөсүнүн ар кайсы өлкөлөрүнөн жана аймактарынан келген 12 фотосүрөтчү Венгриянын тарыхый жана маданий мурастарын, жаратылыш кооздуктарын жана салттуу жашоо-турмушун өздөрүнүн чыгармачылык көз карашы аркылуу сүрөткө тартып, түбөлүккө калтырышат.
Мааракелик жолугушууга түрк дүйнөсүнүн ар кайсы аймактарынын атынан төмөнкү фотографтар катышууда:
- Азербайжан: Рауф Умудов
- Казакстан: Асылхан Абдрайым, Даурен Мухаммеджанов, Алмас Алимжанов, Ернур Манафхан
- Кыргызстан: Алимжан Жоробоев
- Өзбекстан: Рустем Шарипов
- Түркия: Мухаммед Кадри Байрам, Илкин Эскипехливан
- Түндүк Кипр Түрк Республикасы: Гирай Карахасан, Мехмет Гөкйигит
- Россия Федерациясынын Башкырстан Республикасы: Елена Болдырева
Жолугушуунун алгачкы күнүндө катышуучулар үчүн таанышуу жана маалымат берүү жыйыны өткөрүлдү. Иш-чаранын жүрүшүндө фотографтарга 11 күнгө созула турган иш-чаралардын программасы тууралуу кеңири маалымат берилди.
Ачылыш программасына катышкан Түрк мамлекеттер уюмунун (ТМУ) Венгриядагы Өкүлчүлүк кеңсесинин долбоорлор боюнча директору Али Кылычарслан Топуз фотографтар менен жолугушуп, иш-чара тууралуу маалымат алды жана катышуучуларга ийгиликтерди каалады.
Жолугушуунун негизги программаларынын бири Венгрияда өтө турган Улуу Хун-Түрк курултайы болот.
Фотографтар түрк жана хун тектүү элдерди бириктирген Курултайдын алкагындагы атчан оюндардан тартып, улуттук кийимдерге, салтанаттуу иш-чаралардан маданий көрсөтүүлөргө чейин көптөгөн өзгөчө көз ирмемдерди сүрөткө тартып, тарых үчүн калтырышат.
Курултайдын өзгөчө маанайы түрк дүйнөсүнүн фотографтарынын чыгармачылык көз карашы аркылуу документтештирилет.
20 жылдык маданий мурас мааракелик көргөзмө менен жыйынтыкталат
Быйыл 20-жолу өткөрүлүп жаткан ТҮРКСОЙдун Фотографтар жолугушуусу жылдар бою түрк дүйнөсүнүн жалпы маданий мурасын фотосүрөт өнөрү аркылуу документтештирүүгө жана кийинки муундарга жеткирүүгө олуттуу салым кошуп келет.
Уюштурулуп келген иш-чаранын алкагында ушул убакка чейин түрк дүйнөсүнүн ар кайсы аймактарынан жүздөгөн фотографтар жолугуп, чыгармачылык жана кесиптик тажрыйба алмашууга мүмкүнчүлүк алышты. Жолугушуу ошондой эле бекем достук байланыштардын жана кесиптик кызматташтыктын өнүгүшүнө өбөлгө түздү.
Программанын жүрүшүндө Венгриянын ар кайсы шаарларында жүргүзүлө турган фототартуулардын натыйжасында тандалып алынган мыкты эмгектер иш-чаранын соңунда уюштурула турган «ТҮРКСОЙдун 20-Фотографтар жолугушуусунун мааракелик көргөзмөсүндө» көрүүчүлөргө тартууланат.
ТҮРКСОЙ менен Лакителек фондунун биргелешкен мааракелик программасы 2026-жылдын 22-августуна чейин фототартуу иштери жана маданий иш-чаралар менен уланат.
