― 20 апреля 2026 г.

Ташкентте Эл аралык көркөм өнөр фестивалы башталды

20-апрелде Ташкент шаарында Өзбекстандын Көркөм өнөр академиясынын уюштуруусунда өткөн «Эл аралык көркөм жана колдонмо өнөр фестивалы» салтанаттуу түрдө ачылды. Ачылыш аземине Өзбекстандын маданият министри Озодбек Назарбеков да катышты.

Иш-чарада сөз сүйлөгөн Өзбекстандын Көркөм өнөр академиясынын президенти Акмал Нур өлкө президенти Шавкат Мирзиёевге маданият менен искусствого көрсөткөн колдоосу үчүн ыраазычылык билдирди.

Ал өз сөзүндө: «Өлкө башчыбыздын искусство жана чыгармачыл инсандарга болгон колдоосу биз үчүн чоң сыймык. Шавкат Мирзиёев маданиятты ар дайым артыкчылыктуу багыт катары карайт. Ошондой эле ТҮРКСОЙ баш болгон бардык өнөктөш уюмдарга ыраазычылык билдиребиз. Фестивалыбыз жыл сайын өнүгүп, кеңейүүдө,» — деди.

Ачылыш аземи концерттик программа менен уланды. Анда ырчылар Дилмурад Махмудов жана Шухрат Расылбек сахнага чыгып, ал эми мода көрсөтүүсүндө өзбек улуттук кийимдери көрүүчүлөргө сунушталды.

Фестивалдын алкагында алдыдагы күндөрү конференциялар, көргөзмөлөр жана мастер-класстар өткөрүлөт. Бул жылы иш-чарага Кытай, Корея, Румыния, Россия жана ТҮРКСОЙго мүчө өлкөлөрдөн болжол менен 80дей конок катышууда.

20-апрелде башталган фестиваль төрт күнгө созулары күтүлүүдө.