― 1 июня 2026 г.

Өзбекстанда маданият жана искусство ишмерлери мамлекеттик сыйлыктар менен сыйланышты

Өзбекстан Республикасынын Президенти Шавкат Мирзиёевдин 2026-жылдын 28-майындагы жарлыгына ылайык, маданият, искусство жана адабият тармагындагы көрүнүктүү өкүлдөр мамлекеттик сыйлыктарга татыктуу болушту.

Сыйлыктар борбор калаа Ташкент шаарындагы Эл аралык конгресс борборунда өткөн салтанаттуу аземде ээлерине тапшырылды. Иш-чарага Өзбекстандын Президенти Шавкат Мирзиёев да катышты.

«Искусствосу суктандырган элдин үнү дүйнөгө бийик угулат»

Салтанатта сөз сүйлөгөн мамлекет башчысы өлкөнүн кубаттуулугу экономикалык көрсөткүчтөр менен гана эмес, анын руханий дүйнөсү, маданияты, адабияты жана искусствосу менен да өлчөнөрүн белгиледи.

Шавкат Мирзиёев:

«Кайсы элдин адабияты бай, музыкасы жүрөккө жакын, театры турмуштун өзүн чагылдырган, киносу таасирдүү жана искусствосу суктандырган болсо, ошол элдин үнү дүйнөгө бийик угулат», – деди.

Президент өз сөзүндө Жаңы Өзбекстанды куруу процессинде адамдын руханий дүйнөсүн байытуучу өзгөчө маданий чөйрө түзүлүп жатканын белгилеп, бул багыттагы иштерде интеллигенция өкүлдөрүнүн, акын-жазуучулардын, маданият жана искусство ишмерлеринин, ошондой эле чыгармачыл индустрия өкүлдөрүнүн орду өзгөчө экенине токтолду.

167 маданият жана искусство өкүлү мамлекеттик сыйлыкка ээ болду

Салтанаттын жүрүшүндө маданият жана искусство тармагындагы 167 өкүлгө жогорку мамлекеттик сыйлыктар тапшырылды.

Сыйлык ээлеринин катарында өзбек элинин маданий, көркөм жана интеллектуалдык потенциалын өнүктүрүүгө салым кошкон акын-жазуучулар, ырчылар жана музыканттар, бий өнөрүнүн чеберлери, опера ырчылары, композиторлор, театр, кино жана цирк артисттери, бахшылар (элдик дастанчылар), аския өнөрүнүн чеберлери, кол өнөрчүлөр, сүрөтчүлөр, маданий мурас тармагынын адистери, музей жана китепкана кызматкерлери, ошондой эле окутуучулар бар экени белгиленди.

Көзү өткөн устаттардын эмгеги да жогору бааланды

Иш-чаранын алкагында дүйнөдөн кайткан 24 адабият, маданият жана искусство өкүлүнө мамлекеттик сыйлыктар каза болгондон кийин ыйгарылды.

Бул тууралуу Президент Мирзиёев:

«Өлкөбүздүн ар бир жаранынын, алар арабызда болбосо да, эмгегин татыктуу баалоо – биздин руханий парзыбыз. Бул кадам ата-бабалардын элесин аздектеген элибиз тарабынан чын жүрөктөн колдоого алынды», – деп белгиледи.

Сыйлыктар жаңы чыгармачылык ийгиликтерге дем бериши керек

Сөздөрдөн кийин Президент Шавкат Мирзиёев сыйлык ээлерине ардак наамдарды, ордендерди жана медалдарды тапшырып, бул сыйлыктар алардын жаңы чыгармаларды жаратуусуна шык берерине ишеним билдирди.

Өз кезегинде сыйлыкка татыган маданият жана искусство өкүлдөрү өлкөдө чыгармачылыкка түзүлүп жаткан кеңири мүмкүнчүлүктөр үчүн ыраазычылыктарын билдиришти.

Маалыматка ылайык, салтанаттуу аземден кийин Президент Шавкат Мирзиёев маданият жана искусство тармагынын өкүлдөрү менен өзүнчө жолугушуу өткөрүп, тармакты мындан ары өнүктүрүүнүн артыкчылыктуу багыттарын талкуулап, жаңы демилгелерди карап чыкты.