― 22 апреля 2026 г.

Өзбек акыны Шухрат Арифтин кыргыз тилинде жарык көргөн «44 күз» аттуу ыр жыйнагы Ош мамлекеттик университетинде тааныштырылды.

ТҮРКСОЙ уюмунун колдоосу менен басылып чыккан китептин бет ачар аземи Ош мамлекеттик университетинде өттү. Иш-чарага ТҮРКСОЙдун Башкы катчысы Султан Раев, Өзбекстан Жазуучулар союзунун төрага орун басары Гайрат Мажид, Кыргызстандын Улуттук жазуучулар союзунун төрага кеңешчиси, ошондой эле Кыргызстан–Өзбекстан Достук коомунун аткаруучу директору Бегижон Ахмедов, Өзбекстандын эл акыны Усмон Азим, Ош мамлекеттик университетинин ректору Кудайберди Кожобеков, университеттин Филология жана маданияттар аралык коммуникация институтунан профессор, филология илимдеринин доктору Гулина Жамгырчиева, китептин котормочусу Гулимхан Исаева, ошондой эле көптөгөн окумуштуулар, студенттер жана поэзия сүйүүчүлөр катышты.

Программа университеттин короосунда уюштурулган «Достук» аттуу көргөзмөнү көрүү менен башталды. Андан соң музыкалык жана бий өнөрлөрү көрсөтүлдү. Конференция залында уланган расмий бөлүктө ТҮРКСОЙдун Башкы катчысы Султан Раев сөз сүйлөп, адабияттын элдерди жакындатуучу ролуна токтолду.

Ал өз сөзүндө: «Адабият достукту түзгөндө, элдер да бири-бирине жакындайт. Анткени адабият — бул элдерди, жүрөктөрдү бириктирген көрүнбөгөн көпүрө. Жаш жана таланттуу өзбек акыны Шухрат Ариф ушул көпүрөнүн назик куруучуларынын бири. Анын жемиштүү чыгармачылыгы гана эмес, nүрк дүйнөсүнүн өнөр адамдары менен түзгөн жылуу байланыштары да өзгөчө көңүл бурат. Анын ырлары кыргыз тили баштаган казак, түрк жана башка түрк тилдерине которулуп, көптөгөн окурмандарга жетүүдө. Жаш өнөрпоздорубуз ар кандай фестивалдар аркылуу жолугушуп, бири-бирин таанып, достук мамилелерин бекемдеп, өз ара сапарлар менен бул байланыштарды улам чыңдап келишүүдө. Бүгүн биз да ушул маанилүү жолугушууда Шухрат Арифтин кыргыз тилиндеги китебинин бет ачарына күбө болуп жатабыз. Бул багытка берген өзгөчө маани-маңызга ылайык, биз акыныбызга жана анын жалпы түрк дүйнөсүнүн маданиятына кошкон салымына колдоо көрсөтүүнү каалайбыз жана ага чыгармачылык жолунда ийгиликтерди каалайбыз», — деп белгиледи.

Өзбекстандын эл акыны Усмон Азим да Шухрат Арифтин чыгармачылыгын жогору баалап, анын ырлары адамды ойлонууга жана байкоо жүргүзүүгө үндөөрүн белгиледи.

Иш-чаранын жүрүшүндө университеттин студенттери акындын чыгармаларынан үзүндүлөрдү окуп беришти. Ошондой эле Шухрат Ариф өзү да катышуучуларга ырларын окуп берди.

Иш-чаранын соңунда Кыргызстандын Улуттук жазуучулар союзунун төрага кеңешчиси жана Кыргызстан–Өзбекстан Достук коомунун аткаруучу директору Бегижон Ахмедов акынга Кыргызстандын Улуттук жазуучулар союзуна мүчөлүк күбөлүгүн жана төш белгисин салтанаттуу түрдө тапшырды.