― 18 февраля 2026 г.

Алматыда гиддер сынагы өттү: ТҮРКСОЙ жеңүүчүлөргө Түркияда тажрыйба өтөө мүмкүнчүлүгүн берди

Алматы шаардык музейлер бирикмеси тарабынан Дүйнөлүк гиддер күнүнө карата уюштурулган «Алматы – Музейлер шаары» аттуу кесиптик сынак маданий туризм тармагында маанилүү кызматташтыкка жол ачты. Гиддердин кесиптик деңгээлин жогорулатуу, заманбап гиддик ыкмаларды өнүктүрүү жана музей тармагындагы ийгиликтүү долбоорлорду колдоону максат кылган сынактын быйылкы жеңүүчүлөрү ТҮРКСОЙдун колдоосу менен Түркиянын алдыңкы музейлеринде тажрыйба өтөө укугуна ээ болушту.

Сынакта биринчи, экинчи жана үчүнчү орунду алган гиддер ТҮРКСОЙдун салымы менен Түркия Республикасынын тандалган музейлеринде уюштурула турган эл аралык тажрыйба программасына катышып, кесиптик тажрыйбасын арттырууга мүмкүнчүлүк алышат.

Салтанаттуу аземде сөз сүйлөгөн Алматы шаарынын Маданият башкармалыгынын башчысы Данияр Алиев гиддерге ыраазычылык каттарын тапшырды. ТҮРКСОЙдун Казакстандагы өкүлү Нышангүл Каратаева уюмдун Башкы катчысы Султан Раевдин атынан катышуучуларды куттуктап, сынактын жеңүүчүлөрүнө чет өлкөдө тажрыйба өтөө укугун ыйгарган сертификаттарды тапшырды.

Иш-чаранын алкагында Нышангүл Каратаева тарабынан Алматы шаардык музейлер бирикмесинин Эл аралык байланыштар бөлүмүнүн башчысы Алтынжан Хожамуратовага түрк дүйнөсүнүн маданияты менен искусствосун өнүктүрүүгө кошкон зор салымы үчүн ТҮРКСОЙ медалы тапшырылды.