― 9 сентября 2026 г.

Ziya Gökalpın irsi “Göyə yazılmış bir alp” tamaşası ilə Balkanlara daşındı

Türkiyənin Mədəniyyət və Turizm Nazirliyinin Dövlət Teatrları Baş İdarəsi tərəfindən Ziya Gökalpın anadan olmasının 150-ci ildönümü münasibətilə səhnələşdirilən “Göyə yazılmış bir alp” adlı tamaşa Şimali Makedoniya və Kosovonu əhatə edən qastrol səfəri çərçivəsində ilk dəfə xarici ölkələrdə sənətsevərlərlə görüşdü. Qastrol səfəri öncəsi Şimali Makedoniyanın paytaxtı Skopyedə mətbuat üçün məlumatlandırma toplantısı keçirilib.

Türk Dünyasının mühüm fikir adamlarından biri olan Ziya Gökalpın həyatından və düşüncə dünyasından bəhs edən “Göyə yazılmış bir alp” teatr tamaşasının Balkan qastrolunun təqdimatı keçirilib.

Skopye Yunus Əmrə İnstitutunda (YEE) keçirilən mətbuat toplantısında Beynəlxalq Türk Mədəniyyəti Təşkilatı TÜRKSOY-un Baş katibinin müavini Sayit Yusuf, Halkbank AD Skopje-nin baş direktoru Dr. Fatih Şahbaz, Skopye YEE-nin koordinatoru Dr. Yunus Dilber, tamaşanın müəllifi Derya Özer və Ziya Gökalp obrazını canlandıran Ankara Dövlət Teatrının aktyoru Murat Kesim, həmçinin Makedoniya Radio Televiziyasının və ölkənin yerli media nümayəndələri iştirak ediblər.

Toplantıda tamaşanın məzmunu və qastrol proqramı barədə məlumat verilib, əsərin Türkiyədən kənarda ilk dəfə səhnələşdirilməsinin əhəmiyyətinə diqqət çəkilib.

Türkiyənin Mədəniyyət və Turizm Nazirliyinin təklifi və TÜRKSOY Daimi Şurasının yekdil qərarı ilə 2026-cı ilin “Ziya Gökalpı Anma İli” elan edilməsi çərçivəsində hazırlanan əsər məşhur mütəfəkkirin mədəniyyət, dil, millət və kimlik anlayışını teatr səhnəsinə daşıyır.

Derya Özer tərəfindən qələmə alınan və Cem Selin rejissorluğu ilə hazırlanan tamaşada Gökalpın uşaqlıq illərindən Cümhuriyyətin qurulmasına qədər uzanan düşüncə yolu əks etdirilir. Əsərdə bir fikir adamının həyatı vasitəsilə cəmiyyətin yaddaşı, var olmaq iradəsi və ideal axtarışı araşdırılır.

İlk nümayiş Gostivarda

Dövlət Teatrları Baş İdarəsi, TÜRKSOY və YEE-nin əməkdaşlığı, Makedoniya Türk Vətəndaş Cəmiyyəti Təşkilatları Birliyinin (MATÜSİTEB), Skopye Türk Teatrının və Halkbankın dəstəyi ilə təşkil olunan qastrol səfəri sentyabrın 9-da Gostivar şəhərində başlayacaq.

Gostivar Mədəniyyət Evində saat 19:00-da səhnələşdiriləcək ilk nümayişdən sonra yaradıcı heyət sentyabrın 10-da saat 20:00-da Skopye Komediya Teatrında tamaşaçıların qarşısına çıxacaq.

Qastrolun son dayanacağı isə Kosovonun Prizren şəhəri olacaq. Əsər sentyabrın 13-də saat 20:00-da Cemali Berişa Mədəniyyət Evində keçiriləcək II Beynəlxalq Prizren Türkcə Teatr Festivalının bağlanış tamaşası kimi nümayiş etdiriləcək.

Ziya Gökalpın anadan olmasının 150-ci ildönümünə həsr olunan qastrol səfərinin məşhur mütəfəkkirin mədəni irsini Balkanlardakı cəmiyyət və bölgə əhalisi ilə görüşdürməklə yanaşı, Türkiyə ilə Balkanlar arasındakı mədəni əlaqələri daha da gücləndirməsi məqsədi daşıyır.