― 29 января 2026 г.
TÜRKSOY-un Mədəniyyət və İncəsənət Şöbəsinin rəhbəri Arman Nurmuhametoğluna Özbəkistandan milli mükafat
Türk Dünyasının mədəni irsinin qorunması və beynəlxalq müstəvidə tanıdılması məqsədilə həyata keçirilən fəaliyyət Özbəkistan tərəfindən ən yüksək səviyyədə qiymətləndirilib. TÜRKSOY-un Mədəniyyət və İncəsənət Şöbəsinin rəhbəri, tanınmış mədəniyyət xadimi Arman Nurmuhametoğlu Özbəkistan Respublikası Mədəniyyət Nazirliyi tərəfindən təsis edilən nüfuzlu “Yangi O‘zbekiston Yulduzlari” (Yeni Özbəkistan Ulduzları) milli mükafatına layiq görülüb.
Xalqın rəğbəti ilə qazanılan ali mükafat
Özbəkistanın paytaxtı Daşkənddə keçirilən möhtəşəm mükafatlandırma mərasimində Arman Nurmuhametoğlu “Özbək mədəniyyətinin xaricdə ən yaxşı təbliğatçısı” nominasiyası üzrə birinci yerin qalibi olub. Xalq səsverməsi əsasında müəyyənləşdirilən bu mükafat Nurmuhametoğlunun Özbək mədəniyyəti və incəsənətinin dünya miqyasında düzgün və təsirli şəkildə tanıdılmasına verdiyi töhfələrin ictimai səviyyədə təzahürü kimi dəyərləndirilib.
Baş katib Sultan Raev: “Özbəkistan sivilizasiyamızın qızıl beşiyidir”
Mükafat münasibətilə açıqlama verən TÜRKSOY-un Baş katibi cənab Sultan Raev Özbəkistanın Türk Dünyasındakı strateji əhəmiyyətini vurğulayaraq bildirib:
“Özbəkistan qədim tarixi və zəngin sənət irsi ilə türk sivilizasiyasının qızıl beşiyidir. Təşkilatımızın Mədəniyyət və İncəsənət Şöbəsinin rəhbəri cənab Arman Nurmuhametoğlunun bu dəyərli mükafata layiq görülməsi TÜRKSOY çərçivəsində həyata keçirdiyimiz fəaliyyətin doğruluğunu və Özbəkistanla mövcud möhkəm mədəni əlaqələrimizi bir daha təsdiqləyir. Bu nailiyyət ortaq kimliyimizi dünya səhnəsinə çıxarmaq əzmimizin bariz nümunəsidir”.
Mədəni diplomatiyada yeni mərhələ
TÜRKSOY-un Mədəniyyət və İncəsənət Şöbəsinin rəhbəri kimi bir sıra uğurlu layihələrə imza atan Arman Nurmuhametoğlu mərasimdə etdiyi təşəkkür nitqində türk dövlətləri arasında mədəni inteqrasiyanın əhəmiyyətinə diqqət çəkib. O, bu uğurun TÜRKSOY çətiri altında formalaşan birlik ruhunun təzahürü olduğunu bildirərək Özbəkistan Respublikası Mədəniyyət Nazirliyinə minnətdarlığını ifadə edib.
Bu əlamətdar mükafat Andican şəhərinin “2026 Türk Dünyasının Mədəniyyət Paytaxtı” elan olunması ilə sürət qazanan Özbəkistan–TÜRKSOY əməkdaşlığının mədəni sahədəki uğurlarını əks etdirir. TÜRKSOY əməkdaşları Arman Nurmuhametoğlunu bu münasibətlə təbrik ediblər.
