― 20 июня 2025 г.

TÜRKSOY, Prof. Dr. Nizami Cəfərovu Türk mədəniyyətinə misilsiz töhfələrinə görə təltif etdi

Türk Dünyasının ortaq mədəni irsini yaşatmaq və gələcək nəsillərə ötürmək missiyasını daşıyan Beynəlxalq Türk Mədəniyyəti Təşkilatı – TÜRKSOY, bu şərəfli vəzifənin dəyərli simalarından biri olan akademik Nizami Cəfərovu türkoloji və ümumilikdə Türk mədəniyyətinə verdiyi əvəzolunmaz töhfələrə görə təntənəli mərasimlə təltif edib.

TÜRKSOY-un Baş Katibliyinin ev sahibliyi ilə təşkil olunan tədbirdə TEKAR Fondu və İLESAM (Elm və Ədəbiyyat Əsərləri Sahibləri Peşə Birliyi) nümayəndələri başda olmaqla, bir çox alim, yazıçı və mədəniyyət xadimi iştirak edib.

Türk Dünyasının müdrik adı: Nizami Cəfərov

Tədbirin açılış nitqini TÜRKSOY-un Baş katibinin müavini Sayit Yusuf edib. O, çıxışına Baş katib Sultan Raevin salamlarını çatdıraraq başlayıb və Prof. Dr. Nizami Cəfərovun Türk dili və mədəniyyətinə həsr etdiyi həyat yolunu bu sözlərlə ifadə edib:

“Cənab Cəfərov yalnız bir alim deyil, eyni zamanda Türk Dünyasının ortaq yaddaşını ilmə-ilmə toxuyan bir müdrikdir. Onun 34 əsəri türkoloqlar üçün yol göstərici, gənc tədqiqatçılar üçünsə ilham mənbəyidir. Bu gün burada, belə bir dəyəri təltif etməkdən böyük qürur duyuruq.”

Sayit Yusuf çıxışının davamında deyib: “Ədəbiyyatdan dilçiliyə, tarixdən siyasətə uzanan geniş elmi dünyagörüşü ilə Cəfərov, Türk kimliyinin köklərini bəsləyən nadir şəxsiyyətlərdəndir. Bu mənalı gündə təqdim etdiyimiz mükafatlar onun zəhmətinin cüzi əvəzidir, lakin Türk Dünyasının qəlbində tutduğu yerin ölçüsü yoxdur.”

“Tarix və dil körpüdür”

TEKAR Fondunun rəhbəri Prof. Dr. Cəmaləddin Taşkıran isə çıxışında Mustafa Kamal Atatürkün “Dil bir körpüdür, tarix bir körpüdür” sözlərini xatırladaraq Cəfərovun bu körpüləri möhkəmləndirən nadir şəxsiyyətlərdən biri olduğunu qeyd edib:

“O, yalnız kitabları ilə deyil, duruşu ilə də Türk Dünyasının ağsaqqalıdır. Bu gün burada bu seçkin şəxsiyyətə təşəkkür borcumuzu bildirərkən, eyni zamanda Türk mədəniyyətinin gələcəyinə olan ümidlərimizi də yeniləyirik.”

İLESAM başqanı Mehmet Nuri Parmaksız isə çıxışına “Məharət – təqdirə layiqdir” sözləri ilə başlayaraq Cəfərovun əsərlərinin Türk ədəbiyyatında qalıcı iz buraxdığını bildirib:

“Nizami müəllim, yazdıqları ilə sərhədləri aşan bir mədəniyyət elçisidir. Bu gün ona təqdim etdiyimiz mükafatlar, əslində bir vefa borcunun kiçik ifadəsidir.”

“Bu şərəf mənim deyil, Türk Dünyasınındır”

Mükafatlarını almaq üçün kürsüyə çıxan akademik Nizami Cəfərov duyğulu çıxış edərək bildirib:

“Bu gün burada Türk mədəniyyətinə xidmət etmiş bir insan olaraq yox, bu mədəniyyətin mənə bəxş etdiklərinə görə ömür boyu minnətdar olan bir tələbə kimi dayanmışam. Bu təşəkkürnamələr, plaketlər və diplomlar əslində mənə deyil, Türk Dünyasının ortaq irsinə aiddir. TÜRKSOY-a, TEKAR Fonduna və İLESAM-a bu mənalı gün üçün təşəkkür edirəm.”

Cəfərov çıxışında onu yetişdirən müəllimlərinə və həmkarlarına da minnətdarlığını bildirərək bir adı xüsusi vurğulayıb:

“Bu gün burada olmağımda əməyi keçən hər kəsə minnətdaram. Amma bir nəfəri xüsusilə qeyd etməliyəm: Sadık Tural müəllim. O, mənim yalnız müəllimim deyil, eyni zamanda Türk Dünyasının birliyi üçün verdiyi mübarizə ilə bizə örnək olan bir ustaddır. Onun rəhbərliyi olmasaydı, bəlkə də bu yolda bu qədər irəliləyə bilməzdim.”

Türk Dünyasının gələcəyinə ümid

Çıxışının sonunda Nizami Cəfərov Türk dövlətləri arasında mədəni əməkdaşlığın əhəmiyyətindən bəhs edərək gənclərə səslənib:

“Bizlər, Atatürkün dediyi kimi, ‘Mənəvi körpüləri’ möhkəm saxlamaqla məsuluyuq. Bu gün TÜRKSOY-un bayrağı altında bir araya gəlməyimiz bu körpülərin nə qədər güclü olduğunun sübutudur. Gənclərdən gözləntimiz budur ki, bu irsi daha da irəli aparsınlar. Unutmayın: dilimiz birdir, tariximiz birdir, gələcəyimiz də bir olmalıdır.”

Tədbir xatirə şəkli çəkilişi ilə başa çatıb.