― 25 марта 2026 г.
TÜRKSOY Baş katibinin müavini Sayit Yusuf TRT Avaz efirində “Ziya Gökalp İli” vizyonunu təqdim edib
TÜRKSOY Baş katibinin müavini Sayit Yusuf TRT Avaz kanalının qonağı olaraq, Türk Dünyasının fikir öncüllərindən olan Ziya Gökalpin anadan olmasının 150 illiyi münasibətilə elan edilən “Ziya Gökalp İli” çərçivəsində görülən hazırlıqlar barədə mühüm açıqlamalar verib.
“Vətən nə Türkiyədir türklərə, nə Türküstan...”
Çıxışına Gökalpin məşhur “Turan” şeirinə istinadla başlayan Sayit Yusuf bildirib ki, Ziya Gökalp yalnız Türkiyə Cümhuriyyətinin ideoloji əsaslarını formalaşdırmaqla qalmayıb, eyni zamanda bütün Türk Dünyasının mədəni və milli kimlik axtarışına yol göstərən bir qütb ulduzu olub. Yusuf qeyd edib: “Gökalp türklərin nəfəs aldığı hər bir coğrafiyanı vətənin bir parçası kimi görən böyük sosioloq və məfkurə adamıdır”.
2026-cı ilin zəngin tədbirlərlə yadda qalacağını vurğulayan Yusuf anım proqramlarının sabah start götürəcəyini bildirib:
- Açılış mərasimi – Türkiyə Respublikasının Mədəniyyət və Turizm naziri Mehmet Nuri Ersoyun iştirakı ilə tarixi Türk Ocaqları Salonunda (Rəsm və Heykəl Muzeyi) keçiriləcək.
- Akademik mərhələ – 26 mart tarixində Türk Tarix Qurumunda təşkil olunacaq panel və 28 martda Türk Dil Qurumu ilə birgə keçiriləcək simpozium vasitəsilə elmi baza gücləndiriləcək.
- Diyarbəkir və sonrası – May ayının ortalarında Gökalpin doğulduğu Diyarbəkir şəhərində Dicle Universiteti ilə əməkdaşlıq çərçivəsində genişmiqyaslı tədbirlər silsiləsi təşkil olunacaq.
Bakıdan Maltaya, Daşkənddən Salonikiyə qədər Gökalp ruhu
Sayit Yusuf qeyd edib ki, tədbirlər yalnız Türkiyə ilə məhdudlaşmayacaq. Bakı şəhərində keçirilən I Türkologiya Qurultayının 100 illiyi tədbirlərindən başlayaraq Orta Asiya paytaxtlarına, Balkanlardan Gökalpin sürgün həyatı yaşadığı Maltaya qədər geniş coğrafiyada panellər, teatr tamaşaları və konsertlər təşkil ediləcək. O, həmçinin TRT Avaz və Dövlət Teatrlarının bu prosesə xüsusi layihələrlə dəstək verəcəyini əlavə edib.
