― 25 января 2026 г.

TÜRKSOY Baş katibinin müavini Sayit Yusuf TRT Avaz-da Türk Dünyasının gündəmini dəyərləndirdi

Beynəlxalq Türk Mədəniyyəti Təşkilatı TÜRKSOY-un Baş katibinin müavini Sayit Yusuf TRT Avaz kanalında canlı yayımlanan, aparıcılığını Coşkun Özenin etdiyi “Bir Kahve Bin Havadis” verilişinin qonağı olub.

Verilişdə TÜRKSOY-un yaranma tarixi, Türk Dünyasının ortaq mədəni bağları, gələcək vizyonu və həyata keçirilən strateji əməkdaşlıqlar geniş şəkildə müzakirə edilib. Bu çərçivədə 2025-ci il üzrə 42-ci Dövr fəaliyyətləri və “Türk Dünyası Mədəniyyət Paytaxtı Aktau” layihəsi çərçivəsində görülən işlər dəyərləndirilib. Həmçinin 43-cü Dövr planlamaları çərçivəsində Özbəkistanın Andican şəhərinin yeni dövrün mədəniyyət paytaxtı kimi müəyyənləşdirilməsinə dair aktual məlumatlar paylaşılıb.

Türk Dünyasının mədəni irsi insanlığa ilham verən bir modeldir

Çıxışında Sayit Yusuf TÜRKSOY-un türk xalqları arasında mədəni qarşılıqlı əlaqəni gücləndirməyi, ortaq tarix və dəyərlər zəminində davamlı bir bütövlük formalaşdırmağı hədəflədiyini vurğulayıb. O bildirib ki, təşkilat Türk Dünyasının zəngin mədəni irsini sülh və birgəyaşayış anlayışı ilə birləşdirərək insanlığa ilham verən bir model təqdim edir.

Sayit Yusuf, həmçinin Türk Dünyasında ünsiyyəti asanlaşdıracaq “ortaq əlifba” təşəbbüslərinin strateji əhəmiyyətinə toxunaraq, bu mirasın müasir şəraitdə yenidən canlandırılmasının ortaq dil şüurunu möhkəmləndirəcəyini qeyd edib. Gənclik vizyonu çərçivəsində həyata keçirilən “TÜRKSOY Gənclik Görüşləri” layihələrinə də diqqət çəkən Yusuf, bu proqramların gələcəyin qərarvericiləri arasında davamlı dostluqların və ortaq şüurun formalaşmasına şərait yaratdığını bildirib.

Proqramın sonunda TRT Avaz-ın Türk Dünyasının ortaq səsi və “Türkün Avazı” missiyasını daşıyan mühüm bir media qurumu olduğunu vurğulayan Sayit Yusuf, dəvətə görə TRT Avaz ailəsinə və aparıcı Coşkun Özenə təşəkkür edib.