― 18 сентября 2025 г.

TÜRKSOY Baş katibinin müavini Sayit Yusuf Bişkek Maarif Təhsil Kompleksini ziyarət etdi

Beynəlxalq Türk Mədəniyyəti Təşkilatının (TÜRKSOY) Baş katibinin müavini Sayit Yusuf Bişkekdəki səfəri çərçivəsində Bişkek Maarif Təhsil Kompleksini ziyarət edib.

Ziyarətdə Maarif Təhsil Kompleksinin rektoru Esenaliyeva Nazira, rektor müavinləri Seitbek Tillekov (təhsil işləri üzrə), Edilbek Kerimakunov (idarəetmə işləri üzrə), rektor müşaviri Nariste Aliyeva, Türkiyə Maarif Vəqfinin (TMV) Qırğızıstan üzrə ölkə təmsilçisi Hüsnü Bircan və Maarif Təhsil Kompleksinin direktoru Mehmet Çerçikaya iştirak ediblər.

Görüşdə Türkiyə Maarif Vəqfinin Qırğızıstandakı təhsil fəaliyyəti və həyata keçirdiyi layihələr barədə məlumat verilib. Sayit Yusuf, Maarif Vəqfi məktəblərinin təhsil sahəsindəki fəaliyyətlərini yüksək qiymətləndirdiyini bildirərək deyib:
“TÜRKSOY-un Türk Dünyası mədəniyyətini birləşdirmək istiqamətində daşıdığı missiyanı, Maarif Vəqfinin təhsil sahəsində uğurla həyata keçirdiyini görmək qürurvericidir. Bu iki qurumun ortaq dəyərləri gələcəyimiz baxımından böyük əhəmiyyət kəsb edir.”

Ziyarət tərəflər arasında mədəniyyət və təhsil sahələrində əməkdaşlıq imkanlarının müzakirəsi və ortaq layihələrə dair fikir mübadiləsi ilə yekunlaşıb.