― 14 июля 2026 г.
Türkiyə Respublikasının Skopyedəki səfiri Fatih Ulusoya TÜRKSOY medalı təqdim olunub
TÜRKSOY-un Baş katibi Sultan Raev Türk Dünyasının ortaq mədəni irsinin qorunması və təbliği, eləcə də Şimali Makedoniyada yaşayan türk toplumunun görünürlüğünün artırılması istiqamətində göstərdiyi dəyərli xidmətlərə görə Türkiyə Respublikasının Skopyedəki fövqəladə və səlahiyyətli səfiri Fatih Ulusoya TÜRKSOY medalını təqdim edib.
Şimali Makedoniyada keçirilən görüşdə Türkiyə ilə Şimali Makedoniya arasında dostluq və mədəni əlaqələrin inkişafı, həmçinin TÜRKSOY-un fəaliyyətinə göstərilən dəstək məsələləri müzakirə olunub. Görüşdən sonra təşkil olunan təqdimetmə mərasimində Türkiyə Respublikasının Skopyedəki səfiri Fatih Ulusoya TÜRKSOY-un ən nüfuzlu mükafatlarından biri hesab olunan TÜRKSOY medalı təqdim edilib.
“Türk toplumu Şimali Makedoniyanın çoxmədəniyyətli quruluşunun ayrılmaz hissəsidir”
Təqdimetmə mərasimində çıxış edən TÜRKSOY-un Baş katibi Sultan Raev bildirib ki, səfir Fatih Ulusoy fəaliyyət göstərdiyi müddətdə təkcə Türkiyə Respublikasını uğurla təmsil etməklə kifayətlənməyib, eyni zamanda Şimali Makedoniyada yaşayan türk soydaşlarının mədəni və incəsənət dəyərlərinin qorunması, yaşadılması və gələcək nəsillərə ötürülməsi istiqamətində mühüm dəstək göstərib.
Raev vurğulayıb ki, türk toplumu Şimali Makedoniyanın çoxmədəniyyətli quruluşunun ayrılmaz və tarixi tərkib hissəsidir.
“Bu zəngin mədəni irsin qorunması və dəstəklənməsi bütün Türk Dünyası üçün xüsusi əhəmiyyət daşıyır. Hörmətli səfirimizin TÜRKSOY ilə Şimali Makedoniyadakı dövlət qurumları və təşkilatlar arasında əməkdaşlığın möhkəmləndirilməsi, türk dilində təhsilin inkişafı, ədəbiyyat, teatr və musiqi sahələrinə verdiyi töhfələr təşkilatımız tərəfindən yüksək qiymətləndirilir”, – deyə Baş katib bildirib.
Səfir Fatih Ulusoydan təşəkkür
TÜRKSOY medalını böyük qürur və şərəf hissi ilə qəbul etdiyini bildirən Türkiyənin Skopyedəki səfiri Fatih Ulusoy Türkiyə ilə Şimali Makedoniya arasında əsrlərə söykənən dostluq münasibətlərinin daha da inkişaf etdirilməsi istiqamətində fəaliyyətlərini bundan sonra da qətiyyətlə davam etdirəcəklərini vurğulayıb.
Şimali Makedoniyada yaşayan türk toplumunun mədəni irsinin qorunmasına göstərdikləri dəstəyin bundan sonra da davam edəcəyini qeyd edən səfir Fatih Ulusoy ona göstərilən yüksək etimada və səmərəli əməkdaşlığa görə TÜRKSOY-un Baş katibi Sultan Raevə təşəkkürünü ifadə edib.
TÜRKSOY medalı haqqında
TÜRKSOY medalı Türk Dünyasının ortaq mədəni irsinin qorunması və təbliği, mədəni diplomatiyanın inkişafı, eləcə də təşkilatın beynəlxalq miqyasda həyata keçirdiyi fəaliyyətlərə mühüm töhfələr verən şəxslərə və qurumlara təqdim olunan, TÜRKSOY-un ən nüfuzlu institusional mükafatlarından biri hesab edilir.
