― 21 мая 2026 г.
Talasda Beynəlxalq Türkologiya Zirvəsi keçirildi
Talas Bələdiyyəsinin ev sahibliyi, Türk Dövlətləri Təşkilatının Ağsaqqallar Şurasının sədri Binali Yıldırımın himayəsi və iştirakı ilə təşkil olunan “Beynəlxalq Türkologiya Zirvəsi” 20-22 may 2026-cı il tarixlərində Talasda keçirilib.
Türk dili, mədəniyyəti, ortaq əlifba çalışmaları və mədəni gələcək vizyonunun müzakirə olunduğu zirvədə Türkiyə başda olmaqla Azərbaycan, Qazaxıstan, Özbəkistan, Qırğızıstan, Türkmənistan, Şimali Kipr Türk Respublikası və Macarıstandan diplomatlar, alimlər, yazarlar, mədəniyyət xadimləri və Türk Dünyasının nümayəndələri bir araya gəliblər.
Zirvə çərçivəsində Türkçə küçəsinə ekskursiya təşkil olunub, Ortaq Əlifba Abidəsinin açılışı keçirilib və “Türk Dünyasında Ortaq Dil və Mədəni Gələcək” mövzusunda panel baş tutub.
Türk Dünyası Musiqi və Xalq Rəqsləri proqramı
Zirvənin mədəniyyət proqramı çərçivəsində Talas Türk Dünyası Musiqi və Xalq Rəqsləri Kollektivi səhnəyə çıxıb. Kayseri Universitetinin Konqres və Mədəniyyət Mərkəzində keçirilən proqramda Türk Dünyasının müxtəlif bölgələrinə aid musiqilər və xalq rəqsləri sənətsevərlərə təqdim olunub.
Talas Beynəlxalq Türkologiya Zirvəsi
1926-cı il Bakı Türkologiya Qurultayının 100 illiyi münasibətilə təşkil olunan “Talas Beynəlxalq Türkologiya Zirvəsi”nin rəsmi açılış proqramında Talas Bələdiyyəsinin sədri Mustafa Yalçın, TÜRKSOY-un Qazaxıstan üzrə nümayəndəsi Nişangül Karatayeva, Qırğız Respublikası üzrə nümayəndə Marat Tagaev, Türk Dil Qurumunun sədri professor Osman Mert, Kayseri Böyükşəhər Bələdiyyəsinin sədri Memduh Büyükkılıç, Kayseri valisi Gökmen Çiçek, Türk Dövlətləri Təşkilatının Ağsaqqallar Şurasının sədri Binali Yıldırım və digər protokol üzvləri iştirak ediblər.
Mustafa Yalçın çıxışında tədbirin 1926-cı il Bakı Türkologiya Qurultayının 100 illiyi münasibətilə keçirilməsinin xüsusi məna daşıdığını vurğulayaraq bildirib:
“Bir əsr əvvəl yandırılan fikir məşəlinin bu gün Talasda yenidən müzakirə olunması Türk Dünyasının ortaq gələcəyi baxımından son dərəcə önəmlidir.”
TÜRKSOY-un Qazaxıstan üzrə nümayəndəsi Nişangül Karatayeva isə TÜRKSOY-un Baş katibi Sultan Raevın salamlarını çatdıraraq belə bir tədbirin təşkil olunmasından məmnunluq duyduqlarını bildirib.
Karatayeva qeyd edib ki, yüz il əvvəl formalaşan bu fikir bu gün də türk xalqları arasında ortaq mədəni anlayışın inkişafına təsir göstərməkdə davam edir.
Türk Dövlətləri Təşkilatının Ağsaqqallar Şurasının sədri Binali Yıldırım isə çıxışında bildirib:
“Bu gün burada çox mühüm bir toplantı keçiririk. Çünki bu tədbir İlk Türkologiya Qurultayının keçirilməsindən keçən 100 ilin ardından Bakı Türkologiya Konqresinin 100-cü ildönümü münasibətilə təşkil olunur. Əməyi keçən hər kəsi təbrik edirəm. Əslində məsələ olduqca dərindir. 1926-cı il Türkologiya Konqresi böyük ümid və gözləntilərlə keçirilən bir toplantı idi və 130-dan çox nümayəndə iştirak etmişdi. O dövrün şərtləri nəzərə alındıqda belə bir təşəbbüsün həyata keçirilməsi və bu qədər əhəmiyyətli bir təşkilatın baş tutması özü böyük uğurdur.”
Proqramın yekun hissəsində isə “Türk Dünyasında Ortaq Dil və Mədəni Gələcək” adlı panel keçirilib. Paneldə protokol üzvlərinə və gənclərə Ortaq Türk Əlifbası və Türkologiya Zirvəsi ilə bağlı həyata keçirilən işlər barədə təqdimatlar olunub.
