― 16 мая 2026 г.

Şimali Makedoniya və Kosovodan olan gənc yazarlar TÜRKSOY-u ziyarət etdilər

Türk Əməkdaşlıq və Koordinasiya Agentliyinin (TİKA) dəstəyi ilə həyata keçirilən “Bala Balkan Yazıçılığa Hazırlıq Emalatxanası” layihəsi çərçivəsində Türkiyəyə gələn Şimali Makedoniya və Kosovodan olan gənc yazar namizədləri Beynəlxalq Türk Mədəniyyəti Təşkilatı TÜRKSOY-u ziyarət ediblər.

Avrasiya Yazarlar Birliyi və Balkan Yazarlar Birliyinin əməkdaşlığı ilə həyata keçirilən layihə çərçivəsində Ankara və Ədirnəni əhatə edən mədəni ekskursiyada iştirak edən şagird, müəllim və layihə nümayəndələrindən ibarət heyət TÜRKSOY Baş Katibliyində qəbul olunub.

Heyəti TÜRKSOY Baş katibinin müavini Sayit Yusuf qəbul edib. Görüşdə Avrasiya Yazarlar Birliyinin sədri Ufuk Tuzman, Balkan Yazarlar Birliyinin təmsilçisi Hacer Sulooca, eləcə də Şimali Makedoniya və Kosovodan layihəyə qatılan şagird və müəllimlər iştirak ediblər.

Balkanlarda türk dilinin qorunması vurğulandı

Görüş zamanı Balkan coğrafiyasında türk dilinin qorunması, inkişaf etdirilməsi və gələcək nəsillərə ötürülməsinin əhəmiyyəti müzakirə olunub. Uşaqların erkən yaşlardan etibarən ədəbiyyat və yazıçılıq fəaliyyətlərinə yönləndirilməsinin mədəni mənsubiyyət baxımından daşıdığı əhəmiyyətə diqqət çəkilib.

Türk Dünyasının ortaq mədəni irsinin yaşadılmasında gənc nəslin mühüm rol oynadığını bildirən Sayit Yusuf Balkanlardakı türklərin ana dil şüuru ilə yetişməsinin strateji əhəmiyyət daşıdığını vurğulayıb.

Uşaqların türk dilində ifadə bacarıqları inkişaf etdirilir

2024-cü ildə başladılan “Bala Balkan Yazıçılığa Hazırlıq Emalatxanası” layihəsi ilə Balkanlardakı ibtidai sinif şagirdlərinin türk dilində yazılı və şifahi ifadə bacarıqlarının inkişaf etdirilməsi məqsəd qoyulub.

Layihə çərçivəsində şagirdlərə yazıçılıq, mütaliə mədəniyyəti, hekayəçilik və türk dilində ifadə sahələrində təlimlər keçirilərək onların mədəni mənsubiyyət hissinin gücləndirilməsi hədəflənir.

Şimali Makedoniyanın Qostivar, Kalkandelen, Mərkəz Jupa, Kocacık, Elesa, Breştanik, Kırçova, Resne, Üsküp və Dırjilova şəhərləri ilə Kosovonun Prizren şəhərindən iştirakçıların qatıldığı mədəni ekskursiya proqramı vasitəsilə şagirdlərin Türkiyənin tarixi və mədəni məkanlarını yaxından tanıması, həmçinin Türk Dünyasının ortaq dəyərləri ilə tanış olması təmin edilir.

Ziyarət heyətə TÜRKSOY-un fəaliyyəti barədə məlumat verilməsi və xatirə fotosunun çəkdirilməsi ilə başa çatıb.