― 30 мая 2025 г.
Qırğızıstan Respublikası Prezidenti Sadır Japarovun Colon Mamıtov Türk Dünyası Gənc Şairlər Festivalına müraciəti
Beynəlxalq Şeir Festivalının dəyərli iştirakçıları,
Əziz qonaqlar,
Bir zamanlar “Türk Dünyasının Mədəniyyət Ocağı” və “Türk Dünyasının Mədəniyyət Paytaxtı” adlarını daşıyan qədim Oş şəhərimizə Beynəlxalq Şeir Festivalı münasibətilə təşrif buyurmuş dəyərli qonaqlarımızı ən səmimi duyğularımla salamlayır, xoş gəlmisiniz deyirəm.
Bu gün həm şeirə könüldən bağlı olan Qırğız xalqı, həm də bütün Türk Dünyası üçün xüsusi bir gündür.
Sözü zinətə dönüşdürərək onu ahənglə dilə gətirən və mənəvi gücə çevirən sizləri bu şeir bayramı münasibətilə səmimi qəlbdən təbrik edirəm.
Festivalın Türk Dünyasının gənc şairlərini Oş şəhərində bir araya gətirməsi mənim üçün xüsusi sevinc doğurur. Çünki Oş yalnız Türk Dünyasının deyil, bütövlükdə dünya sivilizasiyasına töhfə vermiş, insanlığın mənəvi inkişafında müstəsna yerə malik qədim bir şəhər, tarixi bir mərkəzdir. Bu şəhər təkcə Orta Asiyanın ən qədim yaşayış məkanlarından biri deyil, həm də əsrlərə şahidlik etmiş, İpək Yolunun ruhunu daşıyan, mədəniyyətlərin və sivilizasiyaların qovuşduğu bir yerdir. Burada yaradıcı enerjini, sənətin nəfəsini və ilhamını dərinliklərlə hiss etmək mümkündür.
Beynəlxalq Gənc Şairlər Şeir Festivalının Qırğız xalqının böyük oğlu, ustad şair Colon Mamıtovun əziz xatirəsinə həsr olunması bizim üçün böyük qürur mənbəyidir. Ədəbiyyatda heç kəsi təqlid etməyən, duyğusal şeirləri, yüksək mənəvi dəyərləri və orijinal şəxsiyyəti ilə yaddaşımızda yer alan bu istedadlı söz ustası, bu gün də güclü poeziyası ilə gənc nəsillərə ilham verməyə davam edir.
Belə dəyərli şəxsiyyətlər yetişdirmiş bu bərəkətli torpaqlarda Türk Dünyasının böyük poeziya ənənəsinə həsr olunmuş yeni bir səhifə açılır. Bu gün poeziyaya olan ortaq sevginin bayramıdır!
Şeir — insan ruhunun dərinliklərindəki hissləri və düşüncələri oyadaraq xalqlarımız arasında sərhədləri aşmaq gücünə malik misilsiz bir sənətdir. Bu festival vasitəsilə daxili dünyamızın əks-sədaları, gələcəyə dair ümidlər və ortaq ideallar Türk Dünyasının əbədi dəyərlərini bir daha ucaldacaq.
Günəşli Qırğız torpaqlarında bir araya gələn Türk Dünyasının gənc və istedadlı şairlərinin bu ilk görüşünün xeyirli, uğurlu olmasını arzulayıram. Bu mənalı tədbir — Azərbaycan, Qazaxıstan, Qırğızıstan, Özbəkistan, Türkmənistan, Türkiyə və Macarıstan arasında mədəni əlaqələrin daha da möhkəmlənməsinə, ortaq tariximizin və mənəvi irsimizin tanıdılmasına, yayılmasına və ucaldılmasına doğru atılmış mühüm bir addımdır. Əminəm ki, bu mədəni dialoq gənc istedadları yeni bədii uğurlar üçün ruhlandıracaq.
Əziz poeziya dostları,
Qonaqpərvər Oş şəhərinin poeziya ilə yoğrulmuş zəngin atmosferinə dalaraq ruhunuzun təmizlənməsini və ilhamla dolmanızı arzulayıram.
Festivalda iştirak edən gənclərin bu qədim torpaqlardan unudulmaz təəssüratlarla və Türk Dünyasının birliyinə dair güclü duyğularla ayrılmasını diləyirəm.
Poeziya festivalının yolu açıq, uğurlarla dolu olsun!
Sadır Japarov
Qırğızıstan Respublikasının Prezidenti
