― 18 июля 2026 г.

II Türk Dünyası Gənc Şairlər Festivalı Azərbaycanın qədim şəhəri Şuşada keçirilib

TÜRKSOY tərəfindən Azərbaycan Respublikası Mədəniyyət Nazirliyi və Heydər Əliyev Fondunun dəstəyi ilə təşkil olunan II Türk Dünyası Gənc Şairlər Festivalı 16–17 iyul 2026-cı il tarixlərində Vaqif Poeziya Günləri çərçivəsində Azərbaycanın mədəniyyət paytaxtı Şuşa şəhərində keçirilib. Türk dünyasının altı ölkəsindən gənc şairləri bir araya gətirən festival ortaq ədəbi irsin yaşadılması və mədəni birliyin möhkəmləndirilməsi baxımından mühüm beynəlxalq ədəbi platformaya çevrilib.

Festivalın açılış mərasimində Azərbaycan Respublikasının mədəniyyət naziri Adil Kərimli, TÜRKSOY-un Baş katibi Sultan Raev, Ankara Sosial Elmlər Universitetinin rektoru, professor Musa Kazım Arıcan, Türkiyə Yazarlar Birliyinin baş sədri, professor Muhammed Enes Kala, Azərbaycan Yazıçılar Birliyinin katibi Səlim Babullaoğlu, Qırğızıstan Yazıçılar Birliyinin sədr müavini Atantay Akbarov, Özbəkistan Yazıçılar Birliyini təmsil edən Dilfuza Qarshiboyeva, Türkmənistan Mədəniyyət Nazirliyinin nümayəndəsi Akmurat Rəcəpov, Azərbaycanın Xalq şairi Vahid Əziz, eləcə də Türk dünyasının tanınmış şairləri, yazıçıları, alimləri və mədəniyyət xadimləri iştirak ediblər.

Mükafatlar Şuşada təqdim olunub

II Türk Dünyası Gənc Şairlər Festivalının mükafatlandırma mərasimi Vaqif Poeziya Günlərinin rəmzi məkanlarından biri olan Molla Pənah Vaqif Muzeyinin qarşısında keçirilib.

Qalib gənc şairlərə medal və sertifikatlar Azərbaycan Respublikasının mədəniyyət naziri Adil Kərimli və TÜRKSOY-un Baş katibi Sultan Raev tərəfindən təqdim olunub.

Festivalın yekununda mükafata layiq görülən gənc şairlər bunlardır:

Azərbaycan

• Nadir Rızalı
• Kamal Hüseynzadə
• Tural Balabəyli

Qazaxıstan

• Aliya Inkarbek
• Kundyz Zhubayeva
• Nurtileu Kadyrkul
• Yedilbek Duısenov
• Maksat Dauylbay

Qırğızıstan

• Melis Mamatzhan Uulu
• Yrysgul Izatova
• Maksat Zhangazıev

Özbəkistan

• Madina Norchaeva
• Islom Boboqulov
• Allayar Darmenov

Türkiyə

• Emre Demir
• Melike Yavuzay
• Ümit Çiçəkçi

Türkmənistan

• Garahanjar Bayhanov
• Kerim Hallyyev
• Yusup Meredov

Sultan Raev: Mədəniyyət və poeziya könülləri birləşdirir

Festivalın açılış mərasimində çıxış edən TÜRKSOY-un Baş katibi Sultan Raev Şuşanın Türk dünyasının mədəni yaddaşında xüsusi yerə malik olduğunu vurğulayaraq bildirib ki, II Türk Dünyası Gənc Şairlər Festivalı ortaq tarix, ortaq dil və ortaq mədəniyyət ətrafında birliyin ən gözəl nümunələrindən biridir.

Baş katib qeyd edib ki, dövlətləri sərhədlər ayıra bilər, lakin mədəniyyət, incəsənət və poeziya könülləri birləşdirir. O vurğulayıb ki, Yunus Əmrədən Molla Pənah Vaqifə, Abaydan Məhtimquluya, Colon Mamıtova qədər uzanan ortaq ədəbi irs Türk dünyasını bir-birinə bağlayan ən güclü mənəvi dəyərlərdəndir.

Sultan Raev TÜRKSOY-un gənc şairlərə və gənc sənətkarlara xüsusi önəm verdiyini bildirərək qeyd edib ki, ötən il Qırğızıstanın Oş şəhərində Colon Mamıtovun xatirəsinə keçirilən ilk festivaldan sonra bu il Şuşada təşkil olunan ikinci festival artıq bu təşəbbüsün ənənəyə çevrilməsi istiqamətində mühüm addımdır.

Baş katib festivalın hər il Türk dünyasının fərqli bir şəhərində keçirilməsini və zamanla davamlı mədəni ənənəyə çevrilməsini arzuladıqlarını bildirib. O, gənclərin bir-birini yaxından tanımasının və aralarında möhkəm dostluq münasibətlərinin formalaşmasının Türk dünyasının gələcəyi üçün xüsusi əhəmiyyət daşıdığını qeyd edib.

Gənc şairlər Vaqif Poeziya Günlərinin proqramlarında iştirak ediblər

Festival çərçivəsində gənc şairlər Vaqif Poeziya Günləri proqramı çərçivəsində təşkil olunan poeziya gecələrində, mədəni tədbirlərdə, panel müzakirələrində və yaradıcı görüşlərdə iştirak ediblər. Onlar, həmçinin Şuşanın tarixi və mədəni abidələrini ziyarət edərək Azərbaycanın zəngin ədəbiyyat və mədəniyyət irsi ilə yaxından tanış olmaq imkanı əldə ediblər.

Təşəkkür mesajı

Festivalın bağlanış mərasimində çıxış edən TÜRKSOY-un Baş katibi Sultan Raev II Türk Dünyası Gənc Şairlər Festivalının keçirilməsinə göstərilən qiymətli dəstəyə görə ilk növbədə Heydər Əliyev Fonduna, Azərbaycan Respublikasının mədəniyyət naziri Adil Kərimliyə, Azərbaycan Respublikası Mədəniyyət Nazirliyinə, təşkilatın hazırlanmasında iştirak edən bütün dövlət qurumlarına və təşkilatlara, beynəlxalq münsiflər heyətinə, təşkilat komitəsinə, festivala qatılan şair və yazıçılara, alimlərə və əməyi keçən hər kəsə dərin minnətdarlığını bildirib.

Tədbir iştirakçılarının xatirə fotosunun çəkilməsi ilə festival başa çatıb.