― 8 марта 2025 г.

Əskişəhərdə Türk Dünyası Qadın Milli Geyimləri Sərgisi Təşkil Olundu

Əskişəhər Anadolu Universiteti Türk Dünyası Tətbiq və Araşdırma Mərkəzində, 8 Mart Dünya Qadınlar Günü münasibətilə Türk Dünyası Qadın Milli Geyimləri Sərgisi təşkil olundu.

Sərginin açılış mərasimində Əhməd Yəsəvi Universiteti nəzdində fəaliyyət göstərən Yəsəvi Sənət Topluluğunun sənətçiləri Türk Dünyası musiqilərindən nümunələr təqdim etdilər. TÜRKSOY və Anadolu Universiteti rektorluğunun birgə əməkdaşlığı ilə baş tutan tədbirin açılış çıxışında Anadolu Universiteti Türk Dünyası Tətbiq və Araşdırma Mərkəzinin müdiri, dosent Aysel Kaya, belə bir tədbirin təşkilində böyük əməyi olan Beynəlxalq Türk Mədəniyyəti Təşkilatının (TÜRKSOY) baş katibi Sultan Raevə təşəkkür edərək sözə başladı.

“8 Mart Dünya Qadınlar Gününü qeyd etmək və bu xüsusi günü onurlandırmaq üçün bir araya gəlmişik. Türk Dünyası Tətbiq və Araşdırma Mərkəzi olaraq, Yəsəvi Sənət Topluluğunun Türk Dünyası konserti ilə yanaşı, Türk Dünyasının mədəni irsini əks etdirən Qadın Milli Geyimləri Sərgisini təşkil etməkdən böyük məmnunluq duyuruq”, – deyə Aysel Kaya bildirib.

TÜRKSOY-un təmsilçisinin çıxışı və mədəni əməkdaşlıq

TÜRKSOY-u təmsil edən Gülər Fədai, tədbirə qatılan sənətsevərləri TÜRKSOY baş katibi Sultan Raevin adından salamlayaraq çıxışına başladı. O, TÜRKSOY-un tarixi, üzv ölkələri və məqsədləri haqqında qısa məlumat verdikdən sonra, təşkilatın ən önəmli fəaliyyətlərindən biri olan “Fotoqrafçılar Görüşü” layihəsinə də toxundu. Gülər Fədai qeyd etdi ki, bu görüşlərdən əldə edilən fotoşəkillər albom şəklində toplanaraq, həm Türkiyədə, həm də üzv ölkələrdə sənətsevərlərə təqdim edilir.

“Türkiyənin nüfuzlu universitetlərindən biri olan Əskişəhər Anadolu Universitetində 8 Mart Dünya Qadınlar Günü münasibətilə hazırlanan sərgimizə xoş gəlmisiniz. 8 Mart Qadınlar Günü bizə həyat verən, bizi böyüdüb yetişdirən, fədakarlığı ilə yol göstərən qadınlara həsr olunmuş mühüm bir gündür. Bu münasibətlə bütün qadınlarımızın 8 Mart Gününü təbrik edir, onlara sağlam, xoşbəxt və uğurlu bir həyat arzulayıram. Əskişəhərdə bu möhtəşəm sərgini sənətsevərlərə təqdim etmək imkanı yaradan Anadolu Universitetinin rəhbərliyinə, Türk Dünyası Tətbiq və Araşdırma Mərkəzinə, Yəsəvi Sənət Topluluğuna təşəkkür edir, TÜRKSOY adından gələcəkdə də bu əməkdaşlığın davam etməsini arzulayıram”, – deyə Gülər Fədai bildirib.

Milli Geyimlər Sərgisi və musiqi proqramı

Açılış çıxışlarından sonra TÜRKSOY İletişim və Bilişim Dairəsi əməkdaşı Sağınış Nazar, foto-sərginin təqdimatını edərək, gələn qonaqlara milli geyimlər haqqında ətraflı məlumat verdi.

Sərginin təqdimatından sonra Yəsəvi Sənət Topluluğu, Türk birliyini simvolizə edən “6 Dövlət 1 Millət” adlı musiqili əsərlə çıxışa başladı. Daha sonra bəzi mənbələrdə Noqay Marşı və ya Çingiz Xan Marşı kimi tanınan, Göytürk dövründə döyüş marşı kimi istifadə edildiyi ehtimal edilən “Dombra” əsəri ifa edildi. Ardınca qazax və qırğız rəqsləri nümayiş olundu.

Proqramın davamında Ayımgül Bissembayeva, Dauletkereyin “Koroğlu” adlı əsərini dombra ilə səsləndirdi. Tədbir Qırğızıstanın Əməkdar Artisti Qulira Kasımkulovanın ifasında “Sarı Oy” mahnısı ilə davam etdi. Konsertin bağlanışını isə qazax ozanı Malika Aldamjarova öz musiqiləri ilə etdi.

Tədbirin bağlanışı və TÜRKSOY hədiyyələri

Tədbirin sonunda Gülər Fədai, Türk Dünyası Tətbiq və Araşdırma Mərkəzinin müdiri, Aysel Kaya və Əhməd Yəsəvi Universitetinin Yəsəvi Sənət Topluluğunun baş sənət rəhbəri Hülya Metinə TÜRKSOY adından xatirə hədiyyələrini təqdim etdi.