― 7 сентября 2026 г.

Ədalət və İnkişaf Partiyasının sədr müavini professor Kürşat Zorlu TÜRKSOY-da işgüzar səfərdə olub

Ədalət və İnkişaf Partiyasının sədr müavini, Türk dövlətləri ilə əlaqələr şöbəsinin rəhbəri professor Kürşat Zorlu Beynəlxalq Türk Mədəniyyəti Təşkilatı TÜRKSOY-un Baş katibi Sultan Raevə baş çəkib.

TÜRKSOY-un Baş qərargahında keçirilən və TÜRKSOY Baş katibinin müavini Sayit Yusufun da iştirak etdiyi görüşdə Təşkilatın qarşıdakı dövrdə həyata keçirəcəyi işlər və ortaq Türk Dünyasının gələcəyinə dair qarşılıqlı fikir mübadiləsi aparılıb.

Səfər zamanı professor Kürşat Zorlu müəllif-redaktoru olduğu və Türk Dünyası ədəbiyyatına qazandırılan “Müstəqilliyinin 35-ci ilində Türkiyə-Qırğızıstan münasibətləri” adlı dəyərli əsəri Baş katib Sultan Raevə təqdim edib. Sözügedən kitabda Sultan Raevin qələmə aldığı “Ortaq köklərdən gələcək vizyonuna: Türkiyə ilə Qırğızıstan arasında mədəni diplomatiya və strateji inteqrasiya” başlıqlı məqalə də yer alır.

Sultan Raev: Bu dəyərli əsərdə yer almaqdan böyük xoşbəxtlik duyuram

Ədalət və İnkişaf Partiyasının sədr müavini professor Kürşat Zorlunun ziyarətindən və əsərin nəşr olunmasından məmnunluğunu ifadə edən TÜRKSOY Baş katibi Sultan Raev ortaq mədəni bağlara diqqət çəkərək deyib:

“Dəyərli dostum professor Kürşat Zorlunun böyük səylə, fədakarlıqla və elmi dəqiqliklə ərsəyə gətirdiyi bu mühüm əsərdə mənə aid məqalənin də yer almasından dərin xoşbəxtlik duyuram. Türkiyə ilə Qırğızıstan arasındakı sarsılmaz qardaşlıq bağlarının 35-ci ildönümünə həsr olunmuş bu dəyərli əsər ölkələrimiz arasındakı mədəniyyət körpülərini daha da möhkəmləndirəcək tarixi sənəddir. Türk Dünyasının ortaq gələcəyini qurmaq yolunda qələm, fikir və elm vasitəsilə atılan hər bir addım bizim üçün ölçüyəgəlməz dəyərə malikdir.”

Görüş tərəflərin ortaq Türk Dünyasının gələcəyinə yönəlmiş yeni addımların atılması ilə bağlı razılığa gəlməsi və günün xatirəsinə foto çəkdirməsindən sonra xoşməramlılıq arzuları ilə başa çatıb.