― 12 июня 2025 г.

Beynəlxalq Xalq Musiqi Ansamblları və Xalq Çalğı Alətləri İfaçıları Festivalı Aqtauda başladı

Türk Dünyasının dörd bir yanından gələn sənətçiləri bir araya gətirən Beynəlxalq Xalq Musiqi Ansamblları və Xalq Çalğı Alətləri İfaçıları Festivalı, "Aqtau – 2025 Türk Dünyasının Mədəniyyət Paytaxtı" elanı çərçivəsində 2025-ci il 11 iyununda böyük bir açılışla start götürdü.

Qazaxıstanın qərbində yerləşən Aqtau şəhəri, TÜRKSOY tərəfindən 2025-ci il üçün Türk Dünyasının Mədəniyyət Paytaxtı elan edilmişdi. Bu çərçivədə təşkil olunan festival, Türk xalqlarının ortaq mədəni irsini yaşatmaq və gələcək nəsillərə ötürmək məqsədini daşıyır.

Üç gün davam edəcək festival boyu Azərbaycan, İran, Qırğızıstan, Özbəkistan, Rusiya Federasiyası (Saxa-Yakutiya) və Qazaxıstanın müxtəlif bölgələrindən gələn xalq musiqisi kollektivləri və etno-folklor qrupları səhnə alacaq. İştirakçılar arasında Azərbaycandan "Sırvan" Xalq Musiqi Ansamblı, İrandan "Sərəfşan" Milli Etno Qrupu, Qırğızıstandan "Akak" Xalq Musiqi Toplusu, Özbəkistandan "Soqdiana" Kamera Orkestri, Yakutiyadan "Nam Kılıhax" Ansamblı və Qazaxıstanın Atırav, Qızılorda və Manqıstau vilayətlərindən sənət kollektivləri yer alır.

Festivalın ilk günü səhnə sıralamasını müəyyənləşdirmək üçün keçirilən püşkatma mərasimi ilə başladı. Ənənəvi “aşık” (oyun sümüyü) ilə keçirilən püşkatma rəngli anlara səhnə oldu və hər bir ansambl səhnəyə çıxış sırasını ənənəvi üsulla müəyyənləşdirdi. Aparıcılar aşıqların “sənət yolunun ilk addımı” olduğunu vurğulayaraq bütün ifaçılara uğurlar arzuladılar.

İştirakçı qruplar ənənəvi çalğı alətləri ilə ifa etdikləri nəğmələr və otantik rəqslərlə tamaşaçılara unudulmaz musiqi ziyafəti təqdim edirlər. Festival Türk Dünyasının mədəni müxtəlifliyini və musiqi zənginliyini eyni səhnədə birləşdirərək mədəniyyətlərarası dialoqa töhfə verir.

Aqtaunun Türk Dünyasının mədəni həyatının mərkəzlərindən birinə çevrilməsinə də kömək edən festival, 13 iyun 2025-ci ilə qədər davam edəcək.